Donald Tramp maʼmuriyatidagi "koʻrinmas odam" Toshkentda tugʻilgani aytilmoqda

Serxio Gor 1986 yil 30 noyabrda Toshkent shahrida dunyoga kelgan va tugʻilgan paytidagi ismi Sergey Goroxovskiy boʻlgan. Bu ism hozirgacha ayrim rasmiy hujjatlarda, jumladan, uning 2021 yilda Maltaning Kospikua shahrida 255 ming yevroga xarid qilgan uyiga oid mulk huquqi guvohnomasida ham uchraydi.

Uzoq vaqt maxfiy boʻlib kelgan tugʻilgan joy

Gorning qayerda tugʻilgani uzoq yillar davomida sir saqlangan. 2024 yil dekabrida The Washington Post uni Trampning yangi kadrlar siyosatidagi "taʼsirli, ammo koʻzga koʻrinmas arxitektor" sifatida tavsiflagan edi, lekin hatto uning qaysi mamlakatda tugʻilganini aniqlay olmagan. Ayrim nashrlar uni "Maltadan chiqqan muhojir" deb atagan, biroq bu maʼlumotlar hech qanday hujjatlar bilan tasdiqlanmagan.

Endi esa maʼlum boʻldiki, Gor bolaligining bir qismini Maltada oʻtkazgan va u yerda 1996–1999 yillarda katolik De La Salle College maktabida taʼlim olgan. Maktabdagi maʼlumotlar uning tugʻilgan sanasini ham tasdiqlagan. Uning advokati Robert Garson jurnalistlarga maʼlum qilishicha, Serxio Gor rostdan ham Toshkentda tugʻilgan va bolalik xotiralari sababli Maltadagi uyni oilada saqlab qolishni istagan.

OCCRP maʼlumotlariga koʻra, Gorning onasi Isroil fuqaroligini ham olgan va 1994 yilda Maltada kompaniya ochib, shu orqali mulk sotib olgan. Keyinchalik bu mulk Serxio Gorga oʻtgan. Oila AQShga uning yoshligida koʻchib oʻtgan.

AQShdagi siyosiy faoliyat

Serxio Gor AQShda siyosiy arenada jadal rivojlandi. Avval u senator Rend Pol bilan ishlagan, 2020 yilda esa Donald Trampning “Gʻalaba moliya qoʻmitasi”ga rahbarlik qilgan. Shuningdek, u Winning Team Publishing nashriyotiga ham asos solgan — bu nashriyot Donald Trampning oʻgʻli bilan yaqin hamkorligi bilan mashhur.

Rossiya bilan safarlar

OCCRP’ning qoʻshimcha maʼlumotlariga koʻra, Gor bir necha bor Rossiyaga safar qilgan. 2018 yilda u senator Pol bilan birga Cato Institute tashkiloti tomonidan uyushtirilgan tanishuv safari doirasida Moskvada boʻlgan. Shuningdek, 2017 yilda ham u Rossiyada boʻlgani qayd etilgan — u Vashingtondan “Aeroflot” orqali Moskvaga uchib kelgan va ertasi kuni Rimga uchib ketgan. Advokati buni oddiy tranzit parvoz deb izohlab, Moskvada hech qanday rasmiy uchrashuv boʻlmaganini taʼkidlagan.

"Janom Gor koʻp sayohat qiluvchi shaxs. Moskvada hech qanday uchrashuvi boʻlmagan. Boshqa har qanday taʼbirlar yolgʻon va tuhmatdir", — dedi advokat Garson.

Serxio Gor — jamoatchilik koʻzidan yiroq boʻlgan, ammo siyosiy taʼsiri katta boʻlgan shaxs. Uning Toshkentdan boshlangan hayoti va Vashingtongacha yetib borgan siyosiy safarini endi jurnalistlar birma-bir ochib bermoqda. Uning sirli oʻtmishi va mavhum shaxsiyati Tramp atrofidagi endigina maʼlum boʻlayotgan real kuch tizimlarini namoyon etmoqda.