DXX: 22 kg.dan ortiq giyohvandlik vositalari musodara qilindi

Davlat xavfsizlik xizmati Chegara qoʻshinlari harbiy xizmatchilari tomonidan ichki ishlar xodimlari bilan hamkorlikda oʻtkazilgan tezkor tadbirda Surxondaryo viloyatining Denov tumani hududida harakatlanayotgan “Kobalt” rusumli avtomashina toʻxtatilib, xolislar ishtirokida koʻzdan kechirildi.

Natijada, unda yoʻlovchi sifatida ketayotgan – Denov tumanida yashovchi, 1987 y.t., muqaddam sudlangan shaxsning yonida 9 kg “gashish” moddasi borligi aniqlanib, ashyoviy dalil sifatida olindi.

Tergovga qadar tekshiruv davomida, ushbu giyohvandlik vositasi kelgusida sotish maqsadida tojikistonlik narkokurʼerlar tomonidan yetkazib berilganligi maʼlum boʻldi.

Bu yoʻnalishda Davlat xavfsizlik xizmati, ichki ishlar va bojxona organlari xodimlari hamkorligida Fargʻona viloyatida ham tezkor tadbir oʻtkazildi.

Jumladan, Fargʻona shahrida yashovchi, 1994 va 1988 yillarda tugʻilgan 2 nafar fuqaro ketayotgan avtotransport vositasi shahar hududida harakatlanayotgan vaqtida toʻxtatilib tekshirilganda, ularning yonida 5 kg 862 gr “gashish” moddasi borligi maʼlum boʻldi.

Shundan soʻng, tezkor tadbir davom ettirilib, ulardan ushbu giyohvandlik vositasini har bir kg.ni 89 mln. soʻmdan kelishgan holda sotib olmoqchi boʻlgan vaqtida – Fargʻona shahrida istiqomat qiluvchi, 1997 y.t. fuqaro ham qoʻlga olindi. 

Bundan tashqari, ushbu giyohvandlik vositasini muqaddam Qirgʻiz Respublikasining Botken viloyati Qadamjoy tumanida narkosavdogardan olib, mamlakatimizga kontrabanda yoʻli bilan keltirgan jinoiy guruh yetakchisi - Soʻx tumanida yashovchi, 1987 y.t. shaxs ham protsessual tartibda ushlandi.

Davlat xavfsizlik xizmati va Ichki ishlar organlari xodimlari tomonidan Namangan shahrida oʻtkazilgan tezkor tadbirda, Fargʻona viloyatining Fargʻona tumanida yashovchi, 1992 y.t., muqaddam sudlangan shaxs 3 kg 950 gr “gashish” moddasini xaridorga 38 ming AQSh dollariga sotgan vaqtida ushlandi. 

Shuningdek, u bilan birga kelgan, jinoiy sherigi – Fargʻona tumanida istiqomat qiluvchi, 2000 y.t. fuqaro ham qoʻlga olindi. 

Tezkor tadbir davom ettirilib, 1992 y.t. shaxsning Fargʻona tumanidagi yashash xonadonidan muqaddam Qirgʻiz Respublikasidan keltirilgan 868 gr “gashish” moddasi ham olindi.

Surxondaryo viloyatining Oltinsoy tumanida oʻtkazilgan tezkor tadbirda, 1969 y.t. mahalliy fuqaro va uning Denov tumanida istiqomat qiluvchi, 1986 y.t. jinoiy sherigi oʻzaro kelishgan holda, Tojikiston Respublikasidan olib kelingan 1 kg 962 gr “opiy” moddasini xaridorga 200 mln soʻmga sotgan vaqtlarida Davlat xavfsizlik xizmatining Qoraqalpogʻiston Respublikasi va Surxondaryo viloyati boʻyicha boshqarmalari hamda ichki ishlar organlari xodimlari tomonidan qoʻlga olindi.

Sirdaryo viloyatida kuzatilgan holatda esa, Fargʻona viloyatida yashovchi, 1988 y.t. hamda Andijon viloyatida istiqomat qiluvchi, 1969 y.t. muqaddam sudlangan ikki nafar fuqaro Tojikiston Respublikasidan aylanma yoʻllar orqali olib kelingan 943 gr “opiy” moddasini sotmoqchi boʻlgan vaqtlarida Davlat xavfsizlik xizmati, Ichki ishlar vazirligi hamda Bojxona qoʻmitasining hududiy boshqarmalari xodimlari tomonidan ashyoviy dalillar bilan ushlandi.

Oʻtkazilgan tezkor tadbirlar davomida jami 22 kg 585 gr giyohvandlik vositasining noqonuniy aylanmasiga chek qoʻyildi.

Hozirda barcha holatlar yuzasidan mazkur shaxslarga nisbatan jinoyat ishlari qoʻzgʻatilib, qamoq ehtiyot chorasi qoʻllanildi.