Endi Rossiya oʻz qoʻshinlarida jang qilgan chet elliklarni topshirmaydi

Rossiya Mudofaa vazirligi harbiy qismlari bilan shartnoma orqali xizmatga kirgan xorijlik shaxslar boshqa davlatlarga jinoyat ishi yuritish uchun topshirilmaydi, deb xabar qiladi DW.

Rossiya Jinoyat kodeksiga kiritilayotgan ushbu oʻzgartish qonun ijodkorligi boʻyicha hukumat komissiyasi tomonidan maʼqullangan. Oʻzgartish xorijiy fuqarolar va fuqaroligi yoʻq shaxslarga taalluqli boʻlib, ular Rossiya qoʻshinlarida shartnoma asosida xizmat qilgan yoki qilayotgan, shuningdek, Rossiya qoʻshinlari tarkibida jang harakatlarida qatnashgan boʻlishi mumkin.

Rossiya hukumati bunday shaxslarning mamlakatda turishiga oid bir qator yangi qonun loyihalarini ham tayyorlagan. Ularning biri mamlakatdan chiqarib yuborish chorasini 50 ming rublgacha jarima va 200 soatgacha majburiy mehnat bilan almashtiradi.

Eslatib oʻtamiz, avvalroq oxirgi 4 yilda Oʻzbekistonda xorijiy davlatlardagi harbiy harakatlarda ishtirok etgan 338 kishiga jinoyat ishi qoʻzgʻatilgani haqida xabar berilgan edi. Ushbu shaxslarga nisbatan Oʻzbekiston jinoyat kodeksining tegishli moddalari bilan besh yildan yetti yilgacha muddatga ozodlikdan mahrum etish choralari koʻrilgan.