Honda elektromobillarni simsiz quvvatlash tizimini ishlab chiqmoqda

Elektr yuk mashinalari uchun asosiy muammolardan biri – katta sig‘imli batareyalarni uzoq vaqt davomida quvvatlash zarurati. Ayniqsa, uzoq masofaga qatnaydigan yuk mashinalari uchun quvvatlashga ketgan vaqt tashish samaradorligiga ta’sir etadi.

Yaponiyaning “Honda Motor” (7267.T) avtomobil ishlab chiqaruvchi kompaniyasi elektromobillarni, jumladan, yirik yuk mashinalarini ham harakatlanayotgan vaqtida simsiz quvvatlash texnologiyasini ishlab chiqqani hamda ushbu texnologiyani Yaponiya avtomagistralida sinovdan o‘tkazishni rejalashtirayotganini ma’lum qildi. 

Honda bergan bayonotga ko‘ra, kompaniya mazkur texnologiyani Taisei (1801.T) qurilish kompaniyasi hamda yo‘l quruvchi Taisei Rotec korxonasi bilan hamkorlikda 2027-yil aprelida yoki undan keyin sinab ko’radi. 

Honda’ning tadqiqot bo‘linmasi hamda ushbu ikki kompaniya tomonidan ishlab chiqilgan tizim yo‘l qoplamasiga o‘rnatilgan quvvatlash moslamalaridan harakatdagi transport vositalariga elektr energiyasini simsiz uzatishga mo‘ljallangan. Shu orqali quvvatlash uchun to‘xtashlar sonini qisqartirish maqsad qilingan.

Tizim umumiy og‘irligi taxminan 20 tonnagacha bo‘lgan yuk mashinalarining harakatiga bardosh berishi uchun ishlab chiqilgan. Kompaniya keyingi bosqichda yirik yuk mashinalari uchun 150 kVtgacha quvvat uzatish imkoniyatini ham sinovdan o‘tkazmoqchi.

2026-yil oxiridan boshlab maxsus sinov yo‘lida tizimning uzoq muddatli chidamliligi, harakatlanish vaqtida quvvat uzatish samaradorligi va elektromagnit maydon sizib chiqishiga qarshi choralar tekshiriladi. Kompaniya ushbu texnologiyani dastlab logistika sohasida amaliyotga joriy etishni ko’zlagan.

Honda muhandisi quvvatlash tarmog‘iga nisbatan xarajatlar qanday bo’lishiga izoh bermadi. Shuningdek, buning iqtisodiy jihatdan qanchalik o‘zini oqlashini baholash zarurligini bildirdi.