“ChatGPTdan voz keching” – OpenAI modellariga boykot avj olmoqda

Norozilikka sabab — “Anthropic” kompaniyasining oʻz modeli Claude’ni harbiy maqsadlarda cheklovsiz qoʻllashga rozi boʻlmagani, “OpenAI” esa bunday hamkorlikni qabul qilgani haqidagi xabarlardir.
 

Anthropic va Pentagon oʻrtasidagi nizo

2026 yil fevral oyi oxirida Pentagon va Claude sunʼiy intellekt modelini ishlab chiquvchi “Anthropic” oʻrtasida kelishmovchilik yuzaga kelgan.

Maʼlumotlarga koʻra, AQSh Mudofaa vaziri Pit Xegsett kompaniya bosh direktori Dario Amodeydan Claude modelidan harbiylar tomonidan “har qanday qonuniy maqsadlarda” cheklovsiz foydalanishga ruxsat berishni talab qilgan.

Amodey esa bunday soʻrovni “vijdonan qabul qila olmasligini” bildirgan. Uning taʼkidlashicha, sunʼiy intellekt ayrim holatlarda demokratik qadriyatlarga putur yetkazishi mumkin, ayrim qoʻllanilish ssenariylari esa hozirgi texnologiya imkoniyatlari doirasida xavfsiz tarzda taʼminlanishi mumkin emas.

Xabarlarga koʻra, Pentagon kompaniyani cheklovlarni yumshatishga chaqirgan va aks holda 200 million dollarlik shartnomadan mahrum boʻlishi mumkinligini bildirgan. Natijada “Anthropic” AQSh harbiylarining yangi ichki tarmogʻiga oʻz texnologiyasini yetkazib bermagan yagona yirik AI kompaniyasi boʻlib qolmoqda.
 

OpenAI pozitsiyasi

“Anthropic” bilan muzokaralar toʻxtab qolganidan soʻng, “OpenAI” asoschilaridan biri Sem Altman Pentagon bilan kelishuvga erishilganini maʼlum qildi.

28 fevral kuni u ijtimoiy tarmoqda OpenAI modellari Pentagonning maxfiy tarmogʻiga joylashtirilishini eʼlon qildi. Altmanga koʻra, Mudofaa vazirligi xavfsizlik masalalariga jiddiy yondashgan va hamkorlikka tayyorligini bildirgan.

Bu bayonot prezident Donald Tramp federal idoralarga “Anthropic” texnologiyasidan foydalanishni toʻxtatish haqida koʻrsatma berishi mumkinligi haqidagi xabarlardan soʻng yangradi.

QuitGPT harakati

Ushbu voqealardan keyin “QuitGPT” (“GPTdan voz kechish”) nomli onlayn harakat faollashdi. Kampaniya foydalanuvchilarni ChatGPT obunasini bekor qilishga va OpenAI’ni boykot qilishga chaqirmoqda.

Harakat maʼlumotiga koʻra, 1,5 milliondan ortiq kishi obunani bekor qilish, ijtimoiy tarmoqlarda boykotni qoʻllab-quvvatlash yoki quitgpt.org sayti orqali roʻyxatdan oʻtish kabi qadamlarni amalga oshirgan.

QuitGPT OpenAI’ni jamoat xavfsizligidan koʻra foydani ustun qoʻyishda ayblamoqda. Kampaniya bayonotida “Anthropic” ommaviy kuzatuv yoki inson nazoratisiz qurol yaratish uchun oʻz modellaridan cheklovsiz foydalanishga rozi boʻlmagani taʼkidlangan.

Shuningdek, harakat ChatGPT yagona munosib sunʼiy intellekt yordamchisi emasligini urgʻulab, foydalanuvchilarni boshqa platformalarga oʻtishga daʼvat qilmoqda.

Alternativ sifatida ochiq manbali va maxfiylikka yoʻnaltirilgan yechimlar, shuningdek Gemini va Claude kabi raqobatchi modellar tilga olingan. Ayrim bayonotlarda Grok’dan foydalanmaslik ham tavsiya etilgan.

QuitGPT harakati 3 mart kuni San-Fransiskodagi OpenAI bosh qarorgohi oldida jonli norozilik namoyishini oʻtkazishni rejalashtirgan.

Muallif: Isomiddin Jumanazarov