ФИФА собиқ президенти ЖЧ–2026ни бойкот қилишга чақирди

Блаттер АҚШда ўтказиладиган Жаҳон чемпионатини бойкот қилишга чақириб, буни Трамп маъмуриятининг мамлакат ичида ҳамда халқаро майдондаги сиёсати билан изоҳлади.

У Х ижтимоий тармоғидаги постида Швейцариянинг Der Bund газетаси билан ўтган ҳафтаги интервьюсида журналист Марк Пит томонидан айтилган фикрларни қўллаб-қувватлади. 

“Агар муҳокама қилинган барча жиҳатларни инобатга олсак, мухлисларга бериладиган ягона маслаҳат — АҚШга борманг. Телевизор орқали томоша қилиш анча қулай. Агар борсангиз ҳам, расмийларга ёқмасангиз, дарҳол кейинги рейс билан ортга қайтарилишингиз мумкин”, деган эди Пит интервьюда шундай деган эди:

Шу тариқа ФИФАнинг собиқ раҳбари АҚШда ўтказиладиган Жаҳон чемпионатини бойкот қилишга чақирувчилар сафига қўшилди.

Маълумот учун, Йозеф Блаттер 1998–2015 йиллар давомида ФИФА президенти бўлган ва коррупцияга оид терговлар фонида истеъфога чиққан.

2026 йилги Жаҳон чемпионати АҚШ, Канада ва Мексика ҳамкорлигида 11 июндан 19 июлгача ўтказилиши режалаштирилган.

Халқаро футбол жамоатчилигининг АҚШга нисбатан хавотирлари Трампнинг Гренландия бўйича позицияси, саёҳат тақиқлари, шунингдек, мигрантлар ва иммиграция сиёсатига қарши намойишчиларга нисбатан қўлланилган кескин чоралар билан боғлиқ. Айниқса, Миннеаполис шаҳридаги воқеалар танқидга сабаб бўлган.

Шунингдек, Германия футбол федерацияси вице-президентларидан бири Оке Гёттлих Hamburger Morgenpost газетасига берган интервьюсида Жаҳон чемпионатини бойкот қилиш масаласини жиддий кўриб чиқиш вақти келганини айтди.

Икки ҳафта аввал Трамп маъмурияти Сенегал ва Кот-д’Ивуардан келиши керак бўлган мухлисларнинг сафар режаларини издан чиқарди. Янги чекловларга кўра, ушбу давлатлар фуқаролари аввалдан визаси бўлмаса, жамоаларини қўллаб-қувватлаш учун АҚШга кириши деярли имконсиз.

Шунингдек, Жаҳон чемпионатига йўлланма олган Эрон ва Гаити давлатларидан келадиган мухлислар ҳам АҚШга киритилмайди. Бу давлатлар Трамп маъмурияти жорий этган дастлабки саёҳат тақиқлари рўйхатига киритилган.