Hindistonning yetakchi shifoxonasi Oʻzbekistonda zamonaviy tibbiyot markazi barpo etadi

Xalqaro tadbirda Hindistonning 100 dan ziyod kompaniyasi vakillari ishtirok etdi.

GTTCI raisi Rashmi Saluja Hindiston va Oʻzbekiston oʻrtasida jadal surʼatlar bilan rivojlanib borayotgan iqtisodiy va gumanitar sohalardagi hamkorlik haqida batafsil maʼlumot taqdim etdi. Hindiston delegatsiyasining IV Toshkent xalqaro investitsiya forumidagi ishtiroki doirasida erishilgan kelishuvlar va imzolangan hujjatlarning ahamiyatini alohida taʼkidladi.

Shuningdek, Oʻzbekistonda investitsiyaviy faoliyat yuritish, qoʻshma korxonalar barpo etish, uchinchi mamlakatlarga mahsulotlar va xizmatlar eksport qilish amaliyoti bilan shugʻullanish uchun yaratilgan jozibador muhitga urgʻu berildi.

Anjuman ishtirokchilari eʼtibori tibbiyot, farmatsevtika va taʼlim yoʻnalishlarida olib borilayotgan sheriklik munosabatlariga qaratildi. Xususan, Oʻzbekistonda tashkil etilgan maxsus farmatsevtika erkin iqtisodiy hududlari, davlat rahbari tashabbusi ijrosi doirasida Andijon viloyatida Hindiston bilan birgalikda tibbiyot taʼlimini rivojlantirish uchun barpo qilingan maxsus hudud ikki mamlakat oʻrtasida iqtisodiy va investitsiyaviy hamkorlikni rivojlantirish uchun yangi va istiqbolli imkoniyatlar ochib bergani qayd etildi.

Xalqaro forumda Oʻzbekiston va Hindiston oʻrtasida oliy taʼlim sohasidagi yangi loyihalar taqdim etildi. Xususan, Qoʻqon universitetining Andijon filiali, GTTCI va Hindistonning yetakchi tibbiy klinikalaridan biri – Sir Ganga Ram shifoxonasi hamkorligida hind yoshlarining Oʻzbekistonda tibbiy taʼlim olishga yoʻnaltirish va zamonaviy koʻp qirrali ixtisoslashgan tibbiyot markazini barpo qilish boʻyicha amalga oshirilayotgan saʼy-harakatlar haqidagi maʼlumot anjuman ishtirokchilarida katta qiziqish uygʻotdi.

– Hindiston Global savdo va texnologiya kengashi Qoʻqon universiteti bilan hamkorlik qilishdan faxrlanadi, – deydi GTTCI prezidenti Gaurav Gupta. – Bizning asosiy maqsadimiz Oʻzbekistonda zamonaviy tibbiyot markazini shakllantirishga koʻmaklashish, yoshlarga sifatli tibbiy taʼlim olish uchun qulay sharoit yaratishdir.

Ushbu loyiha doirasida joriy yil Andijonga hindistonlik ming nafarga yaqin yigit-qizlarni jalb qilish hamda yaqin kelajakda Sir Ganga Ram shifoxonasining zamonaviy majmuasini foydalanishga topshirish koʻzda tutilgan. Shu maqsadda Qoʻqon universiteti va GTTCI hamda GTTCI va Sir Ganga Ram shifoxonasi oʻrtasida tegishli memorandumlar imzolangan. Shuningdek, joriy yil iyul oyida Hindiston shifoxonasi delegatsiyasi Qoʻqon va Andijon shaharlarida boʻlib, boʻlajak tibbiyot markazi barpo etiladigan hududlar bilan yaqindan tanishdi va dastlabki muzokaralarni muvaffaqiyatli tarzda oʻtkazdi.

– Zimmamizga qanday masʼuliyat olayotganimizni toʻliq anglaymiz, - deydi GTTCI raisi Rashmi Saluja. – Bu mamlakatlarimiz talaba yoshlari uchun ilgʻor imkoniyatlar va yagona ekotizimni shakllantirish masʼuliyatidir. Eng muhimi, ular birgalikda taʼlim oladi, mehnat qiladi va xalqlarimiz oʻrtasidagi doʻstlik hamda hamkorlikni mustahkamlashga munosib hissa qoʻshadi.

Biznes-forum doirasida, shuningdek, Hindiston kompaniyalari vakillari bilan Oʻzbekistonda yangi biznes loyihalarni amalga oshirish, investitsiyalar jalb qilish va mamlakatimiz mahsulotlarining eksport hajmini koʻpaytirishga qaratilgan muzokaralar oʻtkazildi.