#Inbazar_boycott: Xodimlari zoʻravonlikka uchragan "Inbazar"ga boykot soʻralmoqda

Voqea shanba, yaʼni 13 sentabr kuni poytaxtning Sergeli tumanidagi "Inbazar" savdo markazlaridan birida yuz bergan. Unda doʻkon ishchisi ish vaqtida omborxonadagi yuk tashish aravachasini uzoqdan gʻildiratib yuborgani uchun savdo markazining nazoratchisi tomonidan kaltaklangan. Bu holatni boshqa bir xodim tasvirga olib internetga joylagan. 

Videoda nazoratchi xodimning yuzi va tanasiga 5-6 marotaba urgani tasvirlangan. Mazkur video yuzasidan "Inbazar" savdo doʻkoni asoschisi, ayni vaqtda chet elda boʻlgan Omadbek Xolmatov videomurojaat bilan chiqib, mazkur holat boʻyicha qonuniy chora koʻrilishini bildirgan.

"Ijtimoiy tarmoqlarda tarqalgan videoni koʻrib, oʻzim "shok" boʻlib qoldim. Bu qilingan ablahona ishi uchun xodimni albatta qonuniy javobgarlikka tortilishiga ishonchimiz komil. Yillar davomida ishxonada oʻzaro hurmat boʻlishiga harakat qilamiz, lekin koʻp odam ishlagani uchun buning nazoratini ushlay olmadik. Buning uchun uzr soʻraymiz. Lekin bu zoʻravonlikka qarshimiz, bu holat boʻyicha qonuniy choralar koʻrilyapti. Tafsilotlarini aytamiz. Birgina xodimining oʻylamay qilgan ishi uchun yillar davomida xalq orasida ishonch qozongan va obroʻ orttirgan savdo markazi faoliyatini qoralab tashlamasliklaringizni soʻrayman", deya oʻzini oqlagan u.

Oradan bir muddat oʻtib kompaniyaning Instagram'dagi sahifasiga zoʻravon xodim ichki ishlar boʻlimiga olib borilgani haqida videoxabar joylashtirildi. Toshkent shahar IIBB ham mazkur holat yuzasidan rasmiy munosabat bildirdi.

"Voqea haqiqatdan ham 13 sentabr kuni sodir boʻlgan. Unda 2001 yilda tugʻilgan B.A. oʻzaro kelishmovchilik oqibatida birga ishlovchi 2006 yilda tugʻilgan M.T.ni qoʻli bilan urgan. Bundan tashqari, ushbu holatni savdo majmuasining boshqa xodimi, 1998 yilda tugʻilgan X.E. tomonidan tasvirga olingan", deyiladi rasmiy munosabatda.

15 sentabr kuni "Inbazar" rahbar xodimlaridan biri jabrlanuvchidan rahbariyat nomidan uzr soʻragani, unga "Spark" avtomobili sovgʻa qilinishi va ishga tiklanishi, ishga qaytganda ham "zamstarshiy" lavozimida boʻlishini vaʼda qilgani tasvirlangan video doʻkonining Instagram sahifasiga joylandi. 

Ushbu video ommaga yetib borganidan soʻng "Inbazar"dan reklama olib turadigan ayrimlar birin-ketin kompaniya asoschisini maqtab, tarafkashlik bilan uning yonini olishni boshladi. Ular orasida Oʻzbekiston boks qiroli, "faxrimiz" deb eʼtirof etiladigan Bahodir Jalolov ham bor.

"Inbazar" asoschisi Omadillo (Omadbek) doʻstim birovga qattiq gapirishi mumkin, urishishi mumkin. Lekin yuz foiz javob beraman, birovga ozor yetkazmaydi. Aybdor oʻz jazosini topyapti. Endi barchani Oʻzbekiston brendini qoʻllab-quvvatlashga chaqiraman" deya videomurojaat qilgan Jalolov.

Shuningdek, aktrisa Muqaddas Saʼdullayeva ham "Inbazar" asoschisini oqlab, odamlarga "qoʻy boʻlmanglar", deya Instagram'da post qoldirgan.

"Eh "prosmotr" oʻlsin-a, bitta "prosmotr" uchun, bitta mavzuni ushlab olsak, chaynab aylantiraveradigan zamonga kelib qoldik! Bilib bilmasdan, oxiriga yetmasdan, bittasi yomon desa qoʻyga oʻxshab hammani yomon deb ketaveradigan zamon! Har bir insonning shaxsiy fikri qayerga ketyapti! Faqat koʻrgan narsa bilan xulosa chiqaradigan zamon. Eh Alloh isloh qilsin hammani!", deya yozgan u.

Ammo bu tarafkashliklar uzoqqa bormadi. Kompaniya targʻibotchilarining bu murojaatlaridan keyin kompaniya asoschisining zoʻravonligi aks etgan boshqa videolar chiqib kelishda davom etdi. Mazkur sharmandali holatdan keyin fikr bildirib gapida turolmagan Jalolov yana video qilib, bu safar aytgan gapiga pushaymonligini izhor qildi. Aktirsa esa jim!

"Bir soat oldin bir videoni shoshilib chiqarib qoʻydim. Omadillo (Omadbek)ning faqat yaxshi tomonlarini koʻrgandim. Ishchisini deb oʻzi yomonotliq boʻlib qolmasin deb tarafini olgandim. Ammo oʻzining videolarini koʻrib, fikrim butunlay oʻzgardi. Odamning ichini bilmas ekansan. Oʻzim oʻttizga kirib, ikki marta Olimpiyadada yutdim, ikki marta jahon chempioni boʻldim, lekin hayotda birovga qoʻl koʻtarmaganman. Urushgan boʻlsam, faqat ringda urushganman. Oʻzim zoʻravonlikka qarshiman, mutlaqo qarshiman... Har xil izohlar yozilmoqda, pul-mul olingan deb. Hech qanaqa pulning aloqasi yoʻq. "Inbazar" bilan ham shartnomani allaqachon tugatganman. Men oʻzim zoʻravonlikka qarshiman, hech qachon bunday holatni oqlamayman, aybdorlar oʻz jazosini oladi qonuniy tartibda", degan bokschi.

Doʻkon asoschisining oʻzi ham yana bir videomurojaat bilan chiqdi.

"Juda qoyil qolsa boʻladi. Videolar xuddi 10 yil shakllantirilganga oʻxshaydi. "Stayanka"da boʻlgan holatda 4 kishini urgan xodimimizni hissiyotda qoʻrqitib qoʻygan videomizni tarqatishyapti. Uning urgan videosi ham bor… Voqeaga kamida 3−4 yil boʻlgan. Mayli, hammasi oʻtar, lekin unda har bir odamning umri davomida urishgan videolarining hammasini internetga qoʻyaylik", deya oʻzini oqlashga urindi.

Toshent shahar IIBBning mahalliy nashrlarga bergan maʼlumotiga koʻra, hozirda chet elda boʻlgan "Inbazar" rahbari Omadbek Xolmatovga nisbatan tergovga qadar tekshiruv ishlari boshlangan.

Yuqoridagi holatga odamlar ham jim qarab turmadi. Instagram foydalanuvchilari oʻzlarining sahifalarida #Inbazar_boycott heshtegi bilan kompaniyani yopishga chaqiriqlar qilishda davom etmoqda. Blogerlar esa faol odamlarni qoʻllab-quvvatlamoqda. Ammo davlatning yirik tashkilotlari tomonidan hech bir munosabat berilmayapti. Inson huquqlari boʻyicha ombudsman ham jim. Xoʻsh, siz yuqoridagi vaziyatga qanday fikr bildirasiz? Sizningcha, ish beruvchilar xodimlarga tazyiq oʻtkazishga haqlimi?..