Afgʻoniston energetika infratuzilmasini rivojlantirishga start berildi

Energetika vazirligi axborot xizmati xabariga koʻra, kuni kecha Afgʻonistonning Kobul shahrida energetika sohasiga investitsiyalarni jalb qilish va mamlakat energetika sektorini qoʻllab-quvvatlashga bagʻishlangan birinchi xalqaro konferensiya boʻlib oʻtdi.

Tadbirda Afgʻoniston hukumati vakillari, Oʻzbekiston, Turkmaniston va Tojikiston Respublikalari energetika vazirliklari delegatsiyalari, shuningdek, qator xalqaro tashkilotlar hamda diplomatik vakolatxonalar vakillari ishtirok etdi. 

Unda tomonlar oʻzaro hamkorlik munosabatlarini yanada mustahkamlash chora-tadbirlari xususida soʻz yuritdi.

Anjuman doirasida Afgʻonistonda 220-500 kV kuchlanishli elektr uzatish tarmoqlari va podstansiyalar qurilishi boʻyicha moliyaviy shartnoma imzolandi va loyihaning amaliy bosqichiga start berildi. 

Taʼkidlanganidek, loyihalar 2027 yilning birinchi choragiga qadar amalga oshirilishi koʻzda tutilgan boʻlib, bu Oʻzbekiston va Afgʻoniston oʻrtasida elektr energetikasi yoʻnalishidagi hamkorlikni yanada mustahkamlaydi. 

Shuningdek, Oʻzbekiston Afgʻoniston boʻylab taqsimlash tarmoqlarini modernizatsiya qilish, aqlli hisoblash tizimlarini joriy etish, sohada samaradorlik va shaffoflikni oshirish hamda texnik ekspertiza orqali ishonchli energiya yetkazib berishni taʼminlash kabi yoʻnalishlarda hamkorlik kengaytiriladi. 

Uchrashuv yakunlari shuni koʻrsatadiki, ushbu anjuman nafaqat Afgʻoniston iqtisodiyotini rivojlantirish, balki butun mintaqada barqaror energiya infratuzilmasini shakllantirishda muhim qadamdir.