Pokiston Afg‘onistonda havo zarbalari uyushtirdi

28-iyun kuni Pokiston xavfsizlik kuchlari Pokiston-Afg‘oniston chegarasi bo‘ylab quruqlik va havodan operatsiyalar o‘tkazib, kamida 29 nafar jangarini yo‘q qildi. Bu haqda Reuters xabar berdi.

Tolibon esa o‘zining chegarasiga qilingan havo hujumlari oqibatida o‘nlab odamlar halok bo‘lganini ma’lum qildi.

Pokiston rasmiylarining bayonoti

29-iyun kuni ertalab Pokiston axborot vaziri Attaulloh Tarar X ijtimoiy tarmog‘ida quruqlikdagi hujumlarda “Jamoat ul-Ahror”ga aloqador to‘rt nafar jangari yo‘q qilinganini ma’lum qildi. Mazkur guruh Pokiston Tolibonining bir bo‘lagidir.

Uning qo‘shimcha qilishicha, Paktiya, Paktika va Kunardagi uchta nishonga berilgan havo zarbalari oqibatida 25 nafar jangari o‘ldirilib, katta miqdordagi qurol-yarog‘ va o‘q-dorilar yo‘q qilingan.

Tolibon munosabati

Pokistonning havo zarbalari natijasida o‘nlab odamlar halok bo‘ldi va yaralandi, dedi Afg‘oniston Toliboni matbuot kotibi Zabiulloh Mujohid X ijtimoiy tarmog‘idagi xabarida.

“Hujumlar o‘nlab tinch aholi vakillari, jumladan, ayollar va bolalarni nobud qildi, ba’zilarni jarohatladi. Biz ushbu qo‘rqoqlarcha tajovuzkorlikni qoralaymiz. Bu – jinoyat va vahshiylik”, — dedi Zabiulloh.

Tarar esa o‘z xabarida Pokiston so‘nggi paytlarda sodir etilgan ko‘plab teraktlarga javob qaytarayotganini ta’kidladi.

Shuningdek, 27-iyun kuni Pokiston harbiylari “Jamoat ul-Ahror”ning Karachidagi “Sind Rangers” obyektiga uyushtirgan bombali va qurolli hujumi oqibatida uch nafar harbiy bo‘linma xizmatchisi halok bo‘lgani va to‘rt nafari yaralanganini ma’lum qildi.