Pokistonning havo hujumlari oqibatida Afg‘onistonda 9 kishi halok bo‘ldi – Kobul

1-oktyabr kuni tunda Pokiston Afg‘onistonning ikki viloyatiga havo zarbalari berdi. Buni har ikki davlat tasdiqladi. Afg‘onistonning bildirishicha, bombardimon oqibatida ayollar va bolalardan iborat umumiy 9 kishi halok bo‘lgan, 11 kishi yaralangan.

Pokiston esa zarbalar ikki hududdagi jangarilar yashiringan joylarga berilganini ma’lum qildi. Dastlabki ma’lumotlarga ko‘ra”, 22 nafar jangari o‘ldirilgan.

Tomonlar bergan qurbonlar haqidagi ma’lumotlar hozircha to‘liq tasdig‘ini topmagan.

Ikki davlat o‘rtasidagi vaziyat joriy yil boshida keskinlashganidan beri Pokiston Afg‘oniston hududiga bir necha bor havo zarbalari bergan. Chegara yaqinidagi jangarilar faoliyati tufayli Islomobod va Kobul o‘rtasida uzoq yillik kelishmovchilik mavjud.

BMT ma’lumotlariga ko‘ra, joriy yil boshidan beri chegaradagi hujumlar oqibatida Afg‘onistonda 1 100 dan ortiq tinch aholi halok bo‘lgan yoki yaralangan.

Pokiston tinch aholini nishonga olganini rad etib, mamlakat ichidan turib zarba beradigan jangarilarga qarshi kurashayotganini ta’kidlamoqda. Afg‘oniston esa o‘z hududida jangarilarni yashirayotganini inkor etib keladi.