SHHT “Tolibon”ni Afg‘onistonda inklyuziv hukumat tuzishga chaqirdi

Shanxay Hamkorlik Tashkiloti (SHHT) davlat rahbarlari Bishkekdagi sammitda Afg‘oniston hukumatini barcha etnik va siyosiy guruhlar ishtirokidagi inklyuziv hukumat tuzishga chaqirdi. 

Tegishli band tashkilot davlatlari rahbarlari uchrashuvi yakuni bo‘yicha qabul qilingan Bishkek deklaratsiyasiga kiritildi.

“Faqat barcha etnik va siyosiy guruhlarning keng vakilligiga ega inklyuziv hukumatgina mustahkam tinchlikni ta’minlay oladi”, — deyiladi TASS tomonidan e’lon qilingan hujjatda.

SHHT mamlakatlari terrorizm, urush va giyohvand moddalardan xoli, mustaqil, betaraf va tinch Afg‘onistonni barpo etishga sodiqligini tasdiqladi.

Tashkilot ishtirokchilari, shuningdek, Afg‘onistonda tinchlik, barqarorlik va taraqqiyotni ta’minlashga qaratilgan xalqaro sa’y-harakatlarni qo‘llab-quvvatlashga tayyor ekanini bildirdi.