Tramp benzin qimmatlashishidan ogohlantirdi, Eron esa murosasiz pozitsiyada

Reuters tahliliga ko‘ra, Eron va AQSh o‘rtasida tinchlik muzokaralari yo‘lidagi siljish va Hormuz bo‘g‘ozi orqali neft tankerlari qatnovi to‘xtab qolgan. Urishayotgan tomonlar 28-fevral kuni boshlangan mojaroga chek qo‘yishga intilayotganining biror alomati ko‘rinmayapti.

“Bo‘g‘ozning ochilishi ham, yopilishi ham faqatgina  Eronning buyrug‘iga bog‘liq. Sizlar mag‘lubiyatni tan olib, xomxayollarga berilishni bas qilmaguningizcha, Eron blokadani davom ettiradi”, — deb yozdi Eron Tashqi ishlar vaziri o‘rinbosari Kozim G‘aribobodiy 15-avgust kuni X ijtimoiy tarmog‘ida.

AQSHda benzin narxi 29 foizga oshdi

Tashqi ishlar vaziri Abbos Aroqchining aytishicha, Eron AQSH bilan muzokaralarni qayta boshlashga qaror qilmagan. U “Shahrara News” nashriga bergan intervyusida, urushdan avval jahon neftining beshdan bir qismi tashilgan Hormuzda kemalar qatnovini qayta tiklash uchun Vashington bo‘g‘oz bo‘yicha shartlarni bajarishi kerakligini ta’kidladi.

AQSH prezidenti amerikaliklarni Eron bilan ziddiyat davom etar ekan, benzin narxining biroz oshishiga tayyor bo‘lishga chaqirdi.

14-avgust kuni Nyu-Yorkning Garden-Siti shahrida o‘tkazilgan siyosiy mitingda Tramp “benzinga ozgina ko‘proq pul to‘lash” “o‘ta yovuz mamlakat”ning yadroviy qurolga ega chiqmasligi uchun arzigulik xarajat ekanligini ta’kidladi.

Inflyatsiyaga sabab bo‘layotgan mazkur tendensiya oqibatida 14-avgust kuni AQShda bir gallon benzinning o‘rtacha narxi qariyb 4,08 dollarni tashkil etdi. Bu o‘tgan yilgi mos davrga nisbatan 29 foizga yuqoridir.

Respublikachi Tramp qayta saylanish uchun energiya narxlarini pasaytirish va’dasi bilan targ‘ibot olib bormoqda, demokratlar esa urush oqibatlarini noyabr oyidagi Kongress saylovlarida munozara markaziga aylantirishga urinmoqda.

Eron ham urush ta’sirini his qilmoqda

Eronning keskin bayonotlariga qaramay, mamlakat iqtisodiyoti jiddiy zarar ko‘rmoqda.

Prezident Mas’ud Pezeshkiyon davlat televideniyesidagi chiqishida yuqori inflyatsiyaga AQShning Eron portlarini qamal qilgani va mamlakat neft eksportiga qo‘ygan sanksiyalari sabab bo‘lganini aytdi.

Hormuz orqali neft tashish taqiqlangan

Tramp va G‘aznachilik kotibi Skott Bessent Eronga yanada ko‘proq moliyaviy zarar yetkazishga va’da berdi. Bessent 13-avgust kuni Newsmax telekanalining “Rob Schmitt Tonight” dasturida kelasi hafta Eronga qarshi qo‘shimcha choralar ko‘rilishini ma’lum qildi.

Tehron bo‘g‘ozdagi harakatni nazorat qilishini “blokada” deb ataydi. Vashington esa ayni atamani Eron kemalarining o‘z portlarini tark etishiga qarshi tahdidi uchun qo‘llaydi.

“Biz qilayotgan ish nafaqat o‘zimiz, balki butun dunyo uchun katta xizmatdir... va biz chindan ham ajoyib ish qilyapmiz”, dedi Tramp.

"Kpler" tahliliy kompaniyasiga ko‘ra, 14-avgust kuni Hormuz bo‘g‘ozi orqali atigi ikkita kema o‘tgan. Ularning hech birida xom neft bo‘lmagan. Ayrim kemalar transponderlarini o‘chirib, bo‘g‘ozda kuzatuvsiz harakatlangan bo‘lishi mumkin.

Urushdan oldin bo‘g‘oz orqali kuniga 130 dan ortiq kema o‘tardi.

Eronning ruxsatisiz bo‘g‘oz orqali harakatlanishga jur’at etgan kemalar raketa yoki dron hujumlariga duch kelishi mumkin.

Urushni tugatish bo‘yicha iyun oyida erishilgan dastlabki kelishuv esa barbod bo‘lish arafasida.

“Avvalo, hozir bizda uzaytiradigan sulhning o‘zi yo‘q. Bizda “urushning tugashi” bor edi, endi esa vaziyat o‘zgardi” – dedi Aroqchi.

Mojaroga xusiylar ham qo‘shildi

Eron tomonidan dastaklanadigan xusiylarning Yamandagi hujumlari mintaqadagi urushni yanada kengaytirishi mumkin.

Yamanning xalqaro tan olingan hukumati ma’lum qilishicha, xusiylar 14-avgust kuni Qizil dengizdagi Moha portiga 6 ta ballistik raketa uchirgan. Oqibatida 4 nafar tinch aholi vakili halok bo‘lgan.

Xusiylar nazoratidagi SABA axborot agentligi esa guruh Saudiya Arabistonining Najran shahridagi Aramco obyektini dron yordamida nishonga olganini xabar qildi.