Mozori Sharifda Alisher Navoiy yodgorligi butkul buzib tashlandi

Afgʻonistonning Mozori Sharif shahrida Alisher Navoiy yodgorligining alloma haqidagi maʼlumotlar yozilgan devor qismi buzib tashlandi. Bu haqdagi xabarlar ijtimoiy tarmoqlarda tarqaldi.

Majmuada boʻlgan Navoiy haykali 2023 yil fevral oyida qulatilgan edi. Endi esa, “Tolibon” harakati Afgʻonistonda hokimiyatni egallaganining 4 yilligini bayram qilgan kuni, haykalning ikki yonida joylashgan, mutafakkir haqidagi maʼlumotlar bitilgan devor ham qulatildi.

Oʻzbekiston Tashqi ishlar vazirining matbuot kotibi Ahror Burhonovning maʼlum qilishicha, vazirlik holat yuzasidan rasmiy Kobuldan izoh soʻragan. Afgʻoniston tomoni bergan izohga koʻra, Alisher Navoiy haykali oʻrnatilgan joy “buyuk alloma xotirasiga yetarlicha munosib emasligi”, shoir va mutafakkir uchun “yanada koʻrkam majmua qurilishi lozimligi” bois mahalliy hokimiyat tomonidan “olib tashlangan”.

Shu bilan birga, bu buzish ishlari Afgʻoniston Madaniyat va axborot vazirligi hamda keng jamoatchilik bilan kelishilmagani alohida taʼkidlanib, afgʻon tarafi holat yuzasidan taassuf bildirgan.

“Afgʻoniston hukumati vakillari nafaqat Oʻzbekiston, balki Afgʻoniston xalqi uchun moʻʼtabar boʻlgan Alisher Navoiy xotirasining munosib tarzda abadiylashtirilishini tasdiqlab, buyuk shoir va mutafakkir sharafiga alohida yodgorlik barpo etishga vaʼda berdi. Jumladan, hududni obodonlashtirish, shoir hayoti va ijodiy merosiga oid maʼlumotlarni oʻz ichiga olgan yozuvlarni tiklash hamda amaldagi qarorlarga muvofiq yangi yodgorlik barpo etish hamda u joylashgan maydonga buyuk shoir Alisher Navoiy nomi qoʻyilishi rejalashtirilganini maʼlum qildi.

Afgʻoniston tomoni butun mintaqa uchun birdek qadrli boʻlgan buyuk mutafakkir xotirasini asrab-avaylash borasidagi qatʼiy sodiqligini bildirgan holda, uning nomini munosib eʼzozlash uchun barcha zarur choralar koʻrilishini taʼkidladi”, – deyiladi Oʻzbekiston TIV axborotida.

Kuni kecha Oʻzbekiston Afgʻonistonda 243 mln dollarlik energetika loyihalarini amalga oshirishi mumkinligi xabar qilingandi.