Pentagon 30 yoshdan katta harbiylar uchun testosteron tekshiruvini joriy qildi

2-sentyabr kuni AQSh Mudofaa vazirligi (Pentagon) 30 yosh va undan katta bo‘lgan harbiy xizmatchilarda testosteron yetishmovchiligini aniqlash bo‘yicha yangi, majburiy ko‘rsatmalar e’lon qildi. Bu hujjat Mudofaa vaziri Pit Hegsetning iyul oyida bergan e’lonining davomi hisoblanadi.

Darhol kuchga kiradigan ushbu ko‘rsatma erkaklar va ayollar uchun standartlashtirilgan tekshiruv va davolash tartiblarini belgilaydi. 

Pentagon bayonotiga ko‘ra, bu chora-tadbirlar gormonal va energiya ta’minoti bilan bog‘liq muammolarni aniqlash hamda bartaraf etish orqali harbiy tayyorgarlikni oshirishga qaratilgan.

Testosteron qo‘llanishini targ‘ib qilib kelgan Hegset o‘tgan oyda yangi majburiy tartibni e’lon qildi. Bu esa mutaxassislar orasida bunday siyosatning ilmiy asoslari bor-yo‘qligi haqida savollar uyg‘otdi.

Ushbu qo‘llanmaga ko‘ra, 30 yosh va undan katta erkaklar majburiy tartibda testosteron uchun qon tahlili topshiradi, yoshroq erkaklar esa faqat o‘z xohishiga ko‘ra yoki shifokorlar xavf belgilarini aniqlagan taqdirdagina tekshiriladi.

Qo‘llanmada ayollar uchun testosteron miqdorini aniqlash bo‘yicha muntazam qon tahlillari majburiy etib belgilanmagan. Biroq unda gormonal muvozanat buzilishi hamda energiya tanqisligi va sportdagi nisbiy energiya yetishmovchiligi deb ataluvchi holatlar bilan bog‘liq charchoq yoki hayz sikli buzilishlarini aniqlash uchun skrining o‘tkazishga chaqiriladi.

Shifokorlar testosteronni ommaviy tekshirish keraksiz yoki potensial zararli davolash usullariga olib kelishidan xavotirda. Shuningdek, harbiy xizmatchilar orasida testosteron miqdori pastligini aniqlash bo‘yicha umumiy skrining o‘tkazish AQShning jangovar shayligini oshirishiga oid ishonchli dalillar yo‘qligini ta’kidlashmoqda.