Qozogʻistonda dengizda oqib ketgan soʻnggi askarlar jasadi topildi

Undan so'ng qidiruv-qutqaruv operatsiyasi yakunlandi. Bu haqda Qozog'iston Mudofaa vazirligi ma'lum qildi.

So'nggi harbiylarning jasadlari 25-sentyabr kuni topildi. Qutqaruvchilar dengizda yo'qolgan xizmatchilarni topish uchun tun-u kun ishladi.

«Uzluksiz olib borilgan qidiruv-qutqaruv ishlari davomida avval bedarak yo'qolgan ikki harbiy xizmatchi — serjant Mansur Gumarov va matros Miras Turdibekulining jasadlari topildi», — deyiladi Mudofaa vazirligi xabarida.

Vazirlik qurbonlarning oila a'zolari va yaqinlariga hamdardlik bildirib, ularning oilalariga moddiy va psixologik yordam ko'rsatilishini ma'lum qildi.

Kaspiy dengizidagi fojia 24-sentyabr kuni harbiylar o'quv-jangovar vazifani bajarayotgan paytda yuz bergan. Dastlab dengizda 19 nafar harbiy oqib ketgani haqida xabar berildi, keyinchalik ular soni 17 nafar bo'lgani ma'lum qilindi. Harbiylarning uch nafari qutqarilgan, 14 nafari esa halok bo'lgan.

Fojiaga ob-havoning keskin yomonlashuvi va kuchli shamol sabab bo'lgani aytildi. Qozog'iston Bosh prokuraturasi hodisa yuzasidan jinoyat ishi qo'zg'atib, besh nafar mas'ul shaxsni qo'lga oldi.