Xitoy – Qirg‘iziston – O‘zbekiston temir yo‘lida muhim tunnel qurib bitkazildi

Qirg‘izistonda Xitoy – Qirg‘iziston – O‘zbekiston temir yo‘lining birinchi 209,6 metr uzunlikdagi Kosh-Dobo Shimoliy №2 tunneli qurib bitkazildi. 

Temir yo‘l Qashqardan boshlanib, Qirg‘izistonning tog‘li hududlari orqali o‘tadi va O‘zbekistonning Andijon shahrigacha yetib boradi. Uning umumiy uzunligi 500 kilometrdan oshadi, shundan qariyb 305 kilometri Qirg‘iziston hududidan o‘tadi.

Loyiha doirasida Qirg‘iziston hududida jami 29 ta tunnel qurish rejalashtirilgan. Ularning umumiy uzunligi 104,83 kilometrni tashkil etadi. Shuningdek, temir yo‘l bo‘ylab ko‘priklar, stansiyalar va boshqa infratuzilmalar barpo etilmoqda.

Temir yo‘l foydalanishga topshirilgach, Xitoyning Markaziy Osiyoga chiqish imkoniyatlari kengayishi va Xitoydan Yaqin Sharq hamda Yevropaga olib boruvchi muqobil quruqlik savdo yo‘nalishi shakllanishi kutilmoqda. 

Xalqaro tahlillarda loyiha Rossiya hududidan o‘tuvchi mavjud yo‘nalishlarga muqobil koridor sifatida ham baholanmoqda.