Maktab bitiruvchilari uchun bitiruv kecha tashkillashtirish taqiqlandi

Qirg‘izistonda 9 va 11-sinf bitiruvchilariga ta’lim to‘g‘risidagi hujjatlarni topshirish marosimi 2026-yil 26-iyun kuni soat 09:00 da bo‘lib o‘tadi. Bu haqda "24.kg" nashri xabar berdi.

Xalq ta’limi vazirligi ma’lumotlariga ko‘ra, shu kuni respublikaning barcha umumta’lim maktablarida 9-sinf bitiruvchilariga asosiy umumiy ta’lim to‘g‘risidagi shahodatnomalar, 11-sinf bitiruvchilariga esa o‘rta umumiy ta’lim to‘g‘risidagi attestatlar topshiriladi.

Hujjatlarni topshirish tadbirlarini o‘tkazishda bitiruvchilarning xavfsizligini ta’minlash mas’uliyati ta’lim muassasalari rahbarlari zimmasiga yuklatiladi.

Marosimning o‘zi uchun pul yig‘ish, shuningdek, bitiruvchilar va ularning ota-onalari uchun qo‘shimcha tadbirlar tashkil etish qat’iyan man etiladi.