Qirgʻizistonda oʻlim jazosi qayta tiklanishi mumkin

Maʼlum boʻlishicha, 7 sentabr kuni 2008 yilda tugʻilgan shaxsning jasadi Qirgʻizistonning “Jel-Ariq” qishlogʻidan zoʻrlangan va boʻgʻib oʻldirilgan holda topilgan. Bishkekeda gumonlanuvchi, muqaddam sudlangan shaxs qoʻlga olingan.

Nashrning yozishicha, bu holatni mamlakat prezidenti Sadir Japarov oʻz nazoratiga olgan.

Japaraov Prezident Administratsiyasining Huquqiy taʼminot boʻlimi mudiri Murat Ukushevga bolalar, qizlar va ayollarga nisbatan jinoyatlar uchun eng ogʻir jazoni nazarda tutuvchi qonunchilikka oʻzgartishlar kiritish loyihasini ishlab chiqishni topshirgan. Xususan, bu bolalarni zoʻrlash, shuningdek, ayollarni zoʻrlash va oʻldirish uchun oʻlim jazosini joriy etishni oʻz ichiga oladi.

“Alohida shafqatsizlik bilan sodir etilgan qotillik, voyaga yetmaganni oʻldirish, shuningdek, zoʻrlash yoki jinsiy xarakterdagi boshqa zoʻravonlik harakatlari bilan bogʻliq qotillik uchun oʻlim jazosini belgilash taklif etilmoqda”, — deyiladi xabarda.

“24.kg”ga koʻra, hozirda soʻrovnomada qatnashganlarning 63 foizi mamlakatda oʻlim jazosining qayta tiklanishiga rozi, 23 foizi esa norozi. Qolgan 13 foizi esa mazkur savolga hozirda javob berishga qiynayotganini maʼlum qilgan.

Mazkur jazo turi Qirgʻizistonda 2007 yilda bekor qilingan. Qolaversa oʻlim jazosi mamlakatda oxirgi marta 1998 yilda amalga oshirilgan