Rossiyaning Ukrainaga oxirgi hujumlari oqibatida 16 kishi halok bo‘ldi, 130 kishi jarohatlandi

21-avgust kuni Rossiyaning bir nechta droni Ukraina markazidagi savdo markaziga zarba berishi oqibatida kamida 16 kishi halok bo‘ldi va 130 dan ortiq odam jarohatlandi. Bu haqda Reuters xabar berdi.

Prezident Volodimir Zelenskiy bu voqeani “vahshiylik” deb atab, javob qaytarilishini va’da qildi.

Viloyat gubernatori Oleksandr Ganjaning so‘zlariga ko‘ra, Zelenskiyning ona shahri bo‘lgan Kriviy Rigdagi jarohatlanganlar orasida 22 nafar bola ham bor.

22-avgust kungi hisob-kitoblarga qaraganda to‘qqiz kishi, jumladan ikki nafar bola bedarak yo‘qolgan. Qutqaruvchilar savdo markazi vayronalarini tozalashda davom etmoqda.

“Bunday hujumlar terrorchilik harakatlaridan boshqa narsa emas. Biz albatta javob qaytaramiz”, — dedi Zelenskiy va dunyoni Rossiyani javobgarlikka tortishga chaqirdi.

21-avgust kuni Ukraina janubidagi Mikolayiv viloyatiga Rossiya dronlari tomonidan uyushtirilgan boshqa bir hujumda esa kamida to‘rt kishi, jumladan, uch nafar bola halok bo‘ldi va bir ayol yaralandi, deb xabar berdi Ukraina davlat OAV.

Jang maydonidagi to‘qnashuvlar 4,5 yillik “marra”ga yaqinlashar ekan, Rossiya Ukrainaga qarshi havo hujumlarini kuchaytirdi.

Ukraina ham Moskvaning urush olib borish salohiyatiga putur yetkazish maqsadida Rossiyadagi neft obyektlari va logistika infratuzilmasini nishonga olmoqda.