Kechasi Ukraina Moskva viloyatiga 400 ta dron uchirdi

Moskva meri Sergey Sobyaninning 20-iyul kuni xabar berishicha, kechki soat 8:30 dan ertalabki 5:00 gacha Moskva viloyatiga 400 dan ortiq “dushman droni” uchirilgan.

Ularning aksariyati uzoq masofadagi havo hujumidan mudofaa tizimlari tomonidan zararsizlantirilgan, jumladan, 85 tasi Rossiya poytaxtiga yaqinlashayotganda yo‘q qilingan.

“Havo hujumidan mudofaa kuchlari va radioelektron tizimlar Moskva viloyatiga qilingan dron hujumini qaytardi. Asosiy zararlar Podolsk, Domodedovo va Odintsovo tumanlarida qayd etildi”, — deb yozdi Moskva viloyati gubernatori Andrey Vorobyov Telegram messenjerida.

Vorobyovning so‘zlariga ko‘ra, ikki kishi jarohatlangan, bir nechta fuqarolik infratuzilma obyektlarida yong‘in chiqqan.

Rossiyaning eng yirik onlayn riteyleri bo‘lgan “Wildberries” Podolsk tumanidagi logistika markazi ehtiyot chorasi sifatida evakuatsiya qilinganini, biroq keyinroq faoliyatini odatdagi tartibda davom ettirganini ma’lum qildi.

18-iyul kuni Ukraina dronlarining bir necha to‘lqindan iborat hujumlari oqibatida “Wildberries” omborining yetti nafar xodimi halok bo‘lib, yana o‘nlab kishi jarohatlangan. 

Boshqa bir hujum esa Moskva viloyatidagi neft bazasida yong‘in keltirib chiqargan.