Tramp Gʻazodagi kelishuvning ikkinchi bosqichi boshlanganini maʼlum qildi

Tramp Truth Social ijtimoiy tarmogʻida: “Ikkinchi bosqich hozir boshlandi”, — deb yozdi va bu jarayonni “muhim bosqich” deb atadi.

Uning taʼkidlashicha, HAMAS tomonidan ushlab turilgan 20 nafar tirik garovdagi shaxs ozod etilgan, ularning ahvoli yaxshi. Shu bilan birga, hali qurbonlar jasadlari qaytarilmaganini aytib, ish hali tugamaganini bildirdi.

AQSh rahbariga koʻra, HAMAS “qoʻldagi qurollarni topshirishga rozi boʻlgan”. Tramp bu haqda shunday dedi:

“Ular qurolni tashlaymiz, deb aytdi. Agar tashlamasa, biz ularni qurolsizlantiramiz. Qanday qilib ekanini tushuntirishim shart emas, lekin shunday boʻladi".

Shuningdek, Tramp Misrning Sharm-ash-Shayx shahrida boʻlib oʻtgan sammitda ham bu haqda toʻxtalib, kelishuv bosqichlari oʻzaro bogʻliq ekanini va “ikkinchi bosqich allaqachon boshlanganini” taʼkidladi.

Uning soʻzlariga koʻra, AQSh HAMAS bilan Yaqin Sharq boʻyicha maxsus vakili Stiv Uitkoff orqali muloqot olib borgan va qurolsizlantirish masalasi muhokama qilingan.

Tramp, shuningdek, baʼzi xabarlarga koʻra HAMAS Gʻazodagi ayrim jinoiy guruhlarni yoʻq qilgani haqidagi maʼlumotlarga izoh berib:

“Bu meni bezovta qilmaydi. Ular boshida bir nechta yomon guruhlarni tugatishlari kerak edi — ular shunday qilishdi. Bu men uchun muammo emas,” — dedi.