Turkmaniston O‘zbekiston SIM-kartalariga qarshi reyd boshladi

Internet va aloqa ustidan nazoratni  kuchaytirayotgan Turkmaniston hukumati mamlakatning chegara hududlarida O‘zbekiston mobil operatorlari SIM-kartalaridan foydalanayotgan fuqarolarga qarshi reydlar boshladi. Bu haqda “The times of Central Asia” nashri yozdi.

“Ozodlik” radiosining Turkman xizmati — Radio Azatlyk xabariga ko‘ra, O‘zbekiston bilan chegaradosh Dashog‘uz viloyatidagi 60 dan ortiq aholi punktida tekshiruvlar o‘tkazilgan.

Mahalliy aholi vakillarining aytishicha, xavfsizlik xodimlari reydlar davomida O‘zbekiston SIM-kartalarini aniqlab, ularni musodara qilmoqda.

Diyor qishlog‘i aholisi so‘nggi bir necha kunning o‘zida 10 ta oiladan O‘zbekiston SIM-kartalari olib qo‘yilganini ma’lum qilgan.

SIM-karta uchun jarima va qamoq

Xorijiy mobil aloqa xizmatlaridan foydalangan fuqarolar turli jazolarga duch kelmoqda.

Ayrim hollarda internetdan faqat vaqt o‘tkazish uchun foydalanayotganini aytgan yoki jarima to‘lash imkoniyati bo‘lmagan fuqarolarga faqat ogohlantirish berilmoqda.

Boshqalar esa 50 ming manatgacha jarima yoki qamoq jazosiga hukm etilishi mumkin. Bu jarima rasmiy kurs bo‘yicha qariyb 14,3 ming dollar, qora bozor kursida esa 2,5 ming dollardan ko‘proqni tashkil etadi.

O‘zbekiston SIM-kartalar nega ommalashdi?

Radio Azatlyk suhbatlashgan chegara hududi aholisi O‘zbekiston mobil tarmoqlaridan foydalanishga mahalliy operatorlarning sifatsiz aloqa va barqaror internet taqdim eta olmasligi sabab bo‘layotganini aytgan.

Fuqarolardan birining ta’kidlashicha, O‘zbekiston operatorlari interneti Turkmanistonnikiga qaraganda qariyb 300 baravar tez ishlaydi.

“Hukumatimiz fuqarolarga sifatli aloqa taqdim etolmaydi. U faqat cheklash va bloklashni biladi”, — degan yana bir aholi vakili.

Bitta raqam 450 dollar

Turkmaniston rasmiylari avval ham O‘zbekiston mobil aloqa xizmatlariga qarshi choralar ko‘rgan.

2024-yil iyul oyida Podrobno.uz nashri mamlakatning shimoliy va sharqiy hududlarida ham shunga o‘xshash reydlar o‘tkazilgani haqida xabar bergan edi.

Nashrga ko‘ra, O‘zbekiston SIM-kartalari Turkmanistonning yagona litsenziyaga ega mobil operatori — Altyn Asyr joriy qilgan internet cheklovlarini chetlab o‘tish, shuningdek bloklangan yangilik saytlari va muxolifat platformalariga kirish imkonini bergani sabab katta talabga ega.

O‘zbekiston SIM-kartalari chegarani kesib o‘tuvchi yo‘lovchilar orqali Turkmanistonga olib kirilgan va keyinchalik norasmiy vositachilar tomonidan sotilgan.

Bitta O‘zbekiston telefon raqami mahalliy xaridorlarga taxminan 450 dollarga sotilgani aytilmoqda.

Josuslikka teng jinoyat

Podrobno.uz manbasiga ko‘ra, Turkmaniston hukumati fuqarolarning O‘zbekiston raqamlari orqali xorijiy tashkilotlar bilan muloqot qilayotgani va mustaqil OAVni kuzatayotganidan xavotirda.

Bunday aloqalarda gumon qilingan fuqarolar hatto Turkmaniston Jinoyat kodeksining josuslikka oid moddalari bilan javobgarlikka tortilishi mumkin.

Starlink ham taqiq ostida

Joriy yil aprel oyida huquq-tartibot idoralari Starlink sun’iy yo‘ldosh internet uskunalarini aniqlash va musodara qilish bo‘yicha butun mamlakat bo‘ylab reydlar o‘tkazgani haqida xabarlar tarqalgan edi.

Xodimlar sun’iy yo‘ldosh terminallari o‘rnatilishi mumkin bo‘lgan uylar, ofislar, tijorat binolari va tomlarni tekshirgan.

Starlink Turkmanistonda rasman ruxsat etilmagan bo‘lsa-da, internet tezligining pastligi va davlat nazoratidagi operatorlar cheklovlari sabab ko‘plab fuqarolar ushbu xizmatdan foydalana boshlagan.