Ukraina Yevropa Ittifoqi bilan 6-klaster bo‘yicha muzokara boshladi

Ukrainaning Yevropa Ittifoqiga (YeI) a’zo bo‘lish yo‘lidagi navbatdagi muhim qadam seshanba kuni bosildi. YeI ishlari bo‘yicha vazirlar Ukraina bilan muzokaralarning 6-klasterini ochishni rasman ma’qulladi. Bu haqda Euronews xabar berdi.

“Bu Ukrainaning imkon qadar tezroq olg‘a borishga bo‘lgan qat’iyatidan dalolatdir” – dedi Irlandiya davlat vaziri Tomas Bern.

Ayni paytda Irlandiya Yevropa Ittifoqi Kengashiga raislik qilmoqda va muzokaralarda 27 a’zo davlat nomidan so‘z yuritmoqda.

6-klaster tashqi aloqalarni qamrab oladi va Yevropa Ittifoqiga qo‘shilish bo‘yicha muzokaralarning asosiy yo‘nalishlaridan biri hisoblanadi. Bungacha Ukraina uchun faqat 1-klaster ochilgan bo‘lib, u asosiy tamoyillar va qonun ustuvorligini o‘z ichiga olgan.

Seshanba kuni 6-klaster Moldovaga nisbatan ham ochilishi kutilmoqda. Chunki ikki davlatning Yevropa Ittifoqiga a’zolik jarayonlari o‘zaro bog‘langan.

Boshi berk ko‘chadan chiqildi

Ukraina va Moldova 2022-yilda Rossiya Ukrainaga keng ko‘lamli bosqin boshlaganidan so‘ng Yevropa Ittifoqiga a’zo bo‘lish uchun ariza topshirgan. Har ikki davlat bu orqali Rossiya tahdidiga qarshi o‘z xavfsizligi va mudofaasini mustahkamlashni maqsad qilgan.

Ukraina uchun yangi muzokara bosqichlarining ochilishi Vengriya Bosh vaziri Viktor Orban boshchiligidagi ikki yillik siyosiy turg‘unlikka yakun yasadi. U kengashdagi o‘z ovozidan foydalanib, bu jarayonni bir necha bor to‘xtatgan.

Orban Ukraina g‘arbidagi venger ozchiligi huquqlari bilan bog‘liq nizo tufayli Kiyevning a’zolik arizasini muzlatib qo‘ygandi.

Yaqinda Vengriyada bo‘lib o‘tgan parlament saylovlarida uning siyosiy raqibi Peter Madyar g‘alaba qozonganidan so‘ng Ukraina va Moldovaning Yevropa Ittifoqiga a’zolik jarayoni izchil davom eta boshladi. Natijada iyun oyida 1-klaster ochildi.

Bunga Madyar boshchiligidagi yangi hukumatning Ukraina tomoni bilan hamkorlik qilib, milliy ozchilik masalasini hal etishga erishgani sabab bo‘ldi.

Yevropa komissiyasi Ukraina va Moldova barcha muzokara klasterlarini ochishga texnik jihatdan tayyor, deb hisoblaydi. Keyingi bosqichlar Yevropa Ittifoqiga a’zo 27 davlat hukumatlarining qaroriga bog‘liq.