Ukrainada “Patriot” tutib oluvchilari ishlab chiqarishga ruxsat beriladi — Tramp

Donald Tramp NATOning Anqaradagi sammitida Ukraina prezidenti Volodimir Zelenskiy bilan uchrashib, AQSh Ukrainaga Patriot havo mudofaa tizimi uchun raketa tutib qoluvchilarni ishlab chiqarish litsenziyasini berishini ma’lum qildi.

“Biz sizga “Patriot”larni ishlab chiqarish uchun litsenziya bermoqchimiz. Bu juda zo‘r. Shunda siz bizga “yetarlicha yordam bermayapsiz” deb ayta olmaysiz”, — dedi Tramp.

Uning ta’kidlashicha, Patriot hujum emas, balki mudofaa quroli bo‘lgani sababli bu qarorga kelgan.

Tramp qo‘shimcha tafsilotlarni ochiqlamadi, ammo uchrashuv ohangi uning avvalgi keskin tanqidlaridan tubdan farq qildi. Ilgari Tramp Zelenskiyni hatto “noshukr” deb ham atagan edi.

Bu safar esa Tramp ular o‘rtasida yaxshi munosabatlar shakllanganini, shuningdek, Moskva ham, Kiyev ham urush tugashini istayotganini ta’kidladi.

AQSh prezidenti shu kunning o‘zida Vladimir Putin bilan ham telefon orqali muloqot rejalashtirganini ma’lum qildi. U Zelenskiyni urush sharoitida samarali faoliyat yuritgan lider sifatida baholadi.

“Patriot”lar Ukrainada ham chiqariladi

Qo‘shimcha Patriot raketalari zudlik bilan yuboriladimi, degan savolga Tramp ayrim raketalar darhol yetkazilishi mumkinligini aytdi. Uning fikricha, Ukraina ham qisqa muddat ichida ularni o‘zi ishlab chiqara oladi.

“Bizda “Patriot”lar bor, ammo soni ko‘p emas. Ular o‘zimizgayam kerak. Nazarimda, ular buni ancha tez ishlab chiqara oladi. Biz tushuntirib berganimizdan so‘ng, kompaniyani shu yerga olib kelamiz. Siz kompaniya bilan ishlaysiz. Ularda qurol-yarog‘, hatto ancha murakkablarini ham ishlab chiqarish uchun zo‘r salohiyat bor” — dedi Tramp.

Zelenskiy ancha vaqtdan beri AQShdan Patriot raketalarini so‘raydi. Chunki aynan shu tizim Rossiya uchirayotgan ballistik raketalarni urib tushirishga qodir bo‘lgan yagona havo mudofaa vositasi hisoblanadi.

Tramp “Patriot” raketalarini ishlab chiqarish uchun kompaniyalarga bosim o‘tkazilishi mumkinligini ta’kidladi. “Biz “Patriot”ni ishlab chiqaradigan kompaniyalar ustidan katta kuchga egamiz”, dedi u.

“Biz bu haqda kompaniyani hali xabardor qilmadik, lekin hammasi joyida bo‘ladi. Ishonchim komilki, ular bundan mamnun bo‘lishadi”, dedi Tramp.

“Lockheed Martin” kompaniyasi “Patriot” tizimida qo‘llaniladigan tutib oluvchi raketalarning asosiy pudratchisi hisoblanadi.

Rossiya hujumlarni davom ettirmoqda

Rossiya chorshanbaga o‘tar kechasi yana Kiyevga ballistik raketalar bilan hujum qildi. Bu bir haftadan kam vaqt ichida poytaxtga uyushtirilgan zarbalarning uchinchisidir.

Ukraina harbiy-havo kuchlari ma’lumotlariga ko‘ra, tunda uchirilgan 169 ta drondan 139 tasi urib tushirilgan. Biroq AQShda ishlab chiqarilgan Patriot raketalari tanqisligi sababli beshta ballistik raketaning birortasi yo‘q qilinmagan.

AQSH Ukraina dronlarini sotib olishi mumkin

Zelenskiy Tramp bilan urushni tugatishga oid muhim masalalarni muhokama qilmoqchi ekanini aytar ekan, unga shunday dedi: “Siz bu urushni to‘xtatish uchun qo‘lingizdan kelgan barcha ishni qilishingizga ishonaman”.

Tramp esa “Biz bir talay urushlarni to‘xtatdik. Boshida bu urushni juda oson tugatamiz deb o‘ylabman. Ammo Putin ham, Zelenskiy ham murakkab shaxs”, — dedi.

Tramp AQSh ham o‘z navbatida Ukrainada ishlab chiqarilayotgan dronlarga xaridor bo‘lishi mumkinligini aytib o‘tdi. Urush davomida Ukraina dunyodagi eng rivojlangan dron sanoatlaridan birini shakllantirishga muvaffaq bo‘ldi.

Hozirga qadar Kiyev dron ishlab chiqarish bo‘yicha to‘qqizta xalqaro hamkorlik bitimini imzolagan. Ular orasida Daniya, Estoniya va Niderlandiya bilan tuzilgan kelishuvlar ham bor.