Tayvan mojarosi Ikkinchi jahon urushidan ham xavfli – AQSH vakili

Tayvan bo‘g‘ozida yuz berishi mumkin bo‘lgan mojaro global iqtisodiyotga Ikkinchi jahon urushidan ham katta zarar yetkazishi mumkin.  

Bu haqda 9-sentyabr kuni Taypey xavfsizlik forumida Amerikaning Tayvandagi instituti direktori Raymond Grin aytdi.

Grin mojaroning insoniy oqibatlaridan tashqari, uning jahon iqtisodiyotiga ta’siri nihoyatda katta bo‘lishini ta’kidladi. Uning so‘zlariga ko‘ra, hozir eng muhimi – Tayvan bo‘g‘ozida tinchlikni saqlab qolish masalasi.

AQSH – Xitoy sammitiga umid

Grin yaqinlashayotgan AQSH–Xitoy sammitini ikki davlat o‘rtasidagi strategik barqarorlikni mustahkamlash imkoniyati sifatida baholadi.

Xitoy rahbari Si Szinpin sentyabr oxirida AQSHga borib, prezident Donald Tramp bilan uchrashishi kutilmoqda. Grin AQSHning Hind-Tinch okeani mintaqasidagi faoliyati va hamkorliklarini kuchaytirayotganini qayd etdi.

“Yagona Xitoy”

Xitoy Tayvan bo‘yicha “Yagona Xitoy” pozitsiyasida qat’iy turibdi. Xitoy Tayvan bilan materikning birlashuvini “to‘xtatib bo‘lmaydigan tarixiy tendensiya” deb atamoqda. Pekin tinch yo‘l bilan birlashuv afzalligini aytsa-da, kuch ishlatishdan ham voz kechmagan.

Tayvan hukumati esa Pekinning orol ustidan da’volarini rad etadi. Taypey mudofaa salohiyatini kuchaytirmoqda va 2027-yil uchun mudofaa xarajatlarini ilk bor 1 trillion Tayvan dollaridan oshirishni rejalashtirgan.