Жанубий Кореяда Марказий Осиё давлатлари иштирокида саммит ўтказилади

Бу ҳақда Yonhap агентлиги Жанубий Корея ташқи ишлар вазири Чо Хённинг баёнотига таяниб хабар берди.

Вазирнинг таъкидлашича, мазкур саммит Сеул учун «Янги шимолий сиёсат»ни ривожлантириш йўлидаги муҳим қадам бўлади. Ушбу ташаббус собиқ президент Мун Чже Ин томонидан илгари сурилган бўлиб, Евроосиё ҳудудида тинчлик ва ҳамкорликни мустаҳкамлаш, хусусан Марказий Осиё давлатлари билан алоқаларни кенгайтиришга қаратилган.

Чо Хён саммит нафақат ўзаро ҳамкорликни мустаҳкамлаш, балки таъминот занжирларини диверсификация қилиш ҳамда минтақадаги этник корейслар жамоаси билан алоқаларни ривожлантириш учун ҳам муҳим платформа бўлишини таъкидлади.

The World Korea нашрининг ёзишича, Корея ҳукумати ушбу учрашув доирасида қуйидаги йўналишларда ҳамкорликни кенгайтиришни режалаштирмоқда:

• муҳим фойдали қазилмалар ва энергетика;
• саноат ва рақамли трансформация;
• транспорт ва логистика;
• мудофаа ва хавфсизлик;
• қишлоқ хўжалиги, иқлим ва соғлиқни сақлаш.

Таъминот занжирининг барқарорлиги ва диверсификацияси Корея иқтисодий барқарорлигининг асосий устувор йўналишларидан бири экани қайд этилмоқда.

Ҳозирча Ўзбекистон расмийлари саммит саналари юзасидан изоҳ берганича йўқ.

Эслатиб ўтамиз, 2024 йил ёзида Ўзбекистон президенти 2025 йилда Сеулда «Марказий Осиё — Корея» форматидаги биринчи саммитни ўтказиш таклифини маъқуллаган эди. Минтақа давлатлари, шунингдек, «АҚШ — Марказий Осиё», «Европа Иттифоқи — Марказий Осиё» ва «Япония — Марказий Осиё» форматларидаги учрашувларда ҳам фаол иштирок этиб келмоқда.