Kontrabandachilardan musodara qilingan 267 dona qadimiy tanga va taqinchoqlar Islom sivilizatsiyasi markaziga topshirildi

Yaqinda Surxondaryo viloyati bojxona boshqarmasi "Sariosiyo" chegara bojxona posti xodimlari tomonidan respublika hududidan 267 dona qadimiy tangalar va taqinchoqlar qismlarini noqonuniy yoʻllar bilan olib chiqishga urinish fosh qilingan.

Ushbu ashyolarning qadimiyligi va qiymatini aniqlash maqsadida oʻtkazilgan badiiy ekspertiza xulosasiga koʻra, 39 dona osma bezak koʻrinishidagi kumush tangalar XIX asrda Buxoro amirligida zarb qilingan, 228 ta taqinchoq qismlari esa XIX asr oxiri va XX asr boshlariga mansub deb topildi.

Sudning tegishli qaroriga binoan davlat egaligiga oʻtkazilgan tarixiy buyumlar Bojxona qoʻmitasi raisining tashabbusi bilan Oʻzbekistondagi Islom sivilizatsiyasi markaziga topshirildi.

Shu munosabat bilan Bojxona qoʻmitasi raisi A.Mavlonov va Oʻzbekistondagi Islom sivilizatsiyasi markazi direktori F.Abduxoliqov ishtirokida tarixiy-madaniy boyliklarni topshirish-qabul qilish marosimi boʻlib oʻtdi.

Tadbirda bojxona organlari tomonidan elimizning noyob tarixiy va madaniy boyliklarini asrab-avaylash yoʻnalishida keng koʻlamdagi chora-tadbirlar muntazam davom ettirilayotganligi taʼkidlandi.

Xususan, bebaho va noyob madaniy meros namunalarining noqonuniy ravishda chetga olib chiqib ketilishini oldini olish har bir bojxona xodimining burchiga aylangani eʼtirof etildi.