Prezident Islom sivilizatsiyasi markazida olib borilayotgan ishlar bilan tanishdi

Mazkur ulkan va noyob loyiha davlat rahbarining 2017 yil 23 iyundagi qaroriga asosan boshlangan. Koʻp oʻtmay, 2018 yilgi Ramazon hayiti kuni uning poydevoriga tamal toshi qoʻyilgan edi. Oʻtgan davrda bu yerda katta hajmdagi qurilish va obodonlashtirish ishlari amalga oshirildi.

Markaz qadimiy meʼmoriy anʼanalarimiz va milliy bezaklar uygʻunligida barpo etildi. Inshootning toʻrt tomonida balandligi 34 metrli peshtoqlar, oʻrtada esa 65 metrli milliy uslubdagi gumbaz qad rostlagan.

Inshootning markaziy qismida Qurʼoni karim zali joylashgan. Bu yerda musulmon olamining noyob maʼnaviy durdonasi sanalgan qadimiy Usmon mushafi namoyish etiladi. Shuningdek, somoniylar, qoraxoniylar, xorazmshohlar, temuriylar va boshqa sulolalar davriga oid muqaddas kitob nusxalari, ularning eski oʻzbek tilidagi tarjimalari, shu bilan birga, jahondagi eng nodir qoʻlyozma Qurʼonlardan namunalar ham joy oladi.

Bundan tashqari, davlat rahbarining tashabbusi bilan chet ellarda saqlanayotgan tariximiz va ulugʻ allomalarimiz merosi bilan bogʻliq qimmatli manbalar va ashyolar Oʻzbekistonga qaytarildi. 

Markaz tarkibida 460 oʻrinli anjumanlar zali ham qurib bitkazilgan boʻlib, xalqaro miqyosdagi uchrashuv va ilmiy anjumanlarni oʻtkazish uchun barcha zamonaviy shart-sharoitlar yaratilgan.

Majmuada “Islomdan avvalgi sivilizatsiyalar”, “Birinchi Renessans”, “Ikkinchi Renessans”, “Oʻzbekiston XX asrda” hamda “Yangi Oʻzbekiston – yangi Renessans” boʻlimlari tashkil etilgan. Bu yerda buyuk allomalarimiz faoliyati haqida maʼlumotlar, shuningdek, Imom Buxoriy, Imom Termiziy, Abu Mansur Moturidiy, Bahouddin Naqshband va boshqa ulamolar merosi ham keng yoritilgan.

Shuningdek, tariximizda ilmu maʼrifat va maʼnaviyat homiysi boʻlgan Bibixonim, Nodirabegim, Uvaysiy hamda Anbar Otin kabi moʻʼtabar zotlar faoliyati ham alohida ekspozitsiya sifatida namoyish etilgan.

Davlat rahbari doimo markazning ilmiy-maʼrifiy yoʻnalishini samarali tashkil etish, uning mazmun-mohiyatini boyitib borish zarurligini alohida taʼkidlaydi. Bu borada Oʻzbekiston xalqaro islomshunoslik akademiyasi, Imom Buxoriy, Imom Termiziy va Imom Moturidiy nomidagi ilmiy markazlar bilan hamkorlikni kuchaytirish boʻyicha olib borilayotgan ishlar toʻgʻrisida axborot berildi.

Tashrif chogʻida prezident zallarda amalga oshirilayotgan pardozlash va jihozlash ishlarini koʻzdan kechirdi, boʻlimlar va koʻrgazmalarning mazmun-mohiyati, qoʻllanilayotgan interfaol texnologiyalar bilan yaqindan tanishdi.

Davlat rahbari eksponatlarni mahalliy va xorijiy tashrif buyuruvchilarga har tomonlama qiziqarli hamda tushunarli qilib taqdim etish muhimligini taʼkidladi. Shu maqsadda markazda faoliyat yuritadigan mutaxassis va gidlarning sonini koʻpaytirish, ularni maxsus dasturlar asosida tayyorlash zarurligiga eʼtibor qaratildi.

Markaz faoliyatini mazmunan yanada boyitish, ekspozitsiyalar orqali xalqimiz maʼnaviy va ilmiy merosini toʻliq namoyon etish boʻyicha qator tavsiyalar berildi.