Mubashshir Ahmad Turkiyadagi uyidan gumonlanuvchi sifatida olib ketildi

"Azon Global"ga koʻra, 8 may kunining oʻzida advokatlar ishtirokida surishtiruv ishlari boshlangan. Surishtiruv natijasida Alisher Tursunov Istanbul Deportatsiya markaziga oʻtkazilishi va 9 may kuni u yerdan qoʻyib yuborilishi kerak boʻlgan. 

Ammo oradan 4 kun oʻtgan boʻlsa-da Immigratsiya boshqarmasi Tursunovning qayerdaligi, sogʻligʻi va sud jarayonlari haqida advokat va oila aʼzolariga ham maʼlumotlar berilmayapti.

"Turkiya qonunchiligiga koʻra, nazoratda ushlab turilgan shaxsning oilasiga bu haqida maʼlumot berilishi, uning oʻziga ham yaqinlari bilan muloqot qilishga izn etilishi belgilab qoʻyilgan. Hozirgacha hatto advokatlari ham domladan biror xabar ololmayotganidan, aqalli qayerda saqlanayotganini ham bilolmayotganidan oilasi va yaqinlari asosli ravishda xavotirga tushishmoqda. Boisi ustoz Mubashshir Ahmad uzoq yillardan beri qandli diabet va yuqori qon bosimidan aziyat chekib keladi hamda muntazam ravishda insulin va boshqa dorilar qabul qilishga majbur", deyiladi xabarda.

"Azon Global" Alisher Tursunov haqida har qanday asossiz xabarlarga eʼtibor bermaslikni soʻramoqda, shuningdek Tursunov haqidagi har qanday yangiliklardan oʻzlari maʼlum qilishini taʼkidlagan.

Eslatib oʻtamiz, Joriy yilning fevral oyida Ichki ishlar vaziri matbuot kotibi Mubashshir Ahmad diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etishda gumonlanib qidiruvga berilganini maʼlum qilgan edi.

Ammo oradan biroz vaqt oʻtib, Shohrux Gʻiyosov buni texnik xato ekanligini aytib chiqqandi. 

Unga koʻra, Alisher Tursunov haqidagi qidiruv eʼlon qilingani haqidagi axborotni IIV bazasiga kiritish jarayonida texnik xatoga yoʻl qoʻyilgan.