Abituriyentlarning sal kam yarmi testdan yiqildi

Ochiq maʼlumotlarga koʻra, joriy yilda 737 ming 351 nafar abituriyent testga kirgan. Bu oʻtgan yilgiga qaraganda 151 mingga kam degani. Testga kirgan abituriyentlarning 345 ming 869 nafari 56,7 ballni ham yigʻa olmadi. 

Bloger va huquqshunos Xushnuddek Xudoyberdiyevning tahliliga koʻra, bu natijani oʻtgan yilgi holat bilan solishtirganda nisbatan yaxshi. 

"Umuman olganda, yildan yilga yaxshi tomonga oʻzgarish bor. Oʻtgan yili 49,4% foiz, aniqrogʻi 439 ming abituriyent 56,7 ball ham toʻplay olmagandi, joriy yilda bu koʻrsatkich 2.5% ga yaxshilandi. 2024 yilda eng yomon koʻrsatkich Sirdaryo viloyatida (51,8%), nisbatan yaxshiroq natija esa doimgidek Toshkent shahrida (35,9%) qayd etilgan", 

deydi u. 

Oʻtgan yili 8 ta hududda abituriyentlarning 50 foizdan koʻprogʻi 56,7 balldan past ball olgan. Joriy yilda bunday hududlarning soni 4 taga tushgan. Jizzax, Navoiy, Qashqadaryo va Toshkent viloyati oʻz natijasini yaxshilab, 50 foizdan pastki chiziqqa oʻta olgan. 

Quyidagi hududlar esa oʻtgan yilga qaraganda natijasini eng koʻp yaxshilangan 5 ta hududga kirdi: 

Toshkent shahri — 4,9 foizga; 
Toshkent viloyati — 4,9 foizga; 
Jizzax viloyati — 3.7 foizga; 
Buxoro viloyati — 3,5 foizga; 
Sirdaryo viloyati — 3,1 foizga oshgan. 

"56,7 ball — bu toʻplash mumkin boʻlgan eng yuqori 189 balning 30 foizi degani. Yaʼni abituriyent hech boʻlmasa 30 foiz bilimga ega boʻlsa, ushbu koʻrsatkichni toʻplay oladi. 30 foiz bilim esa reyting tizimidan qiyos olsak, hatto 2 baho ham emas! 1 baho desak toʻgʻri boʻlar balki",

 deya oʻz fikrini xulosalagan bloger.