Olimpiada kundaligi: Oʻzbekiston hisobiga ikkita oltin medal qoʻshildi

Shu kunning oʻzida bahslarga kirishgan Tokio Olimpiadasi chempioni Ulugʻbek Rashidov -68 kg vazn toifasida taekvondo boʻyicha musobaqa finaligacha yetib keldi. Ortda qolgan bahslarda raqiblaridan yaqqol ustun kelgan Rashidov uchun final jangi biroz qiyin kechdi. Shunga qaramay amaldagi Olimpiada chempioni azaliy raqib Iordaniya vakili Zaid Karimni magʻlub etib, ketma-ket ikki marta taekvondo boʻyicha Olimpiadaning oltin medalini qoʻlga kiritgan ilk oʻzbek sportchisi boʻldi. 

Boks boʻyicha oʻsmirlar Olimpiadasi gʻolibi, jahon chempioni Abdumalik Xalokov Olimpiadaning final yoʻllanmasi uchun -57 kg vazn toifasida avstraliyalik Charli Seniorga qarshi ringga chiqdi. Tajribali bokschi Abdumalik 3 raundda ballar hisobiga raqibidan ustun keldi va final yoʻllanmasini qoʻlga kiritdi. Uning final jangi 11 avgust kuni Munarbek Seyitbek oʻgʻliga qarshi boʻlib oʻtadi. 

Oʻzbek boksi professori, Rio Olimpiadasi chempioni Hasanboy Doʻsmatov final jangini oʻtkazdi. Bu bosqichda unga mezbon sportchi Bilal Bennama raqib boʻldi. Oʻta qiziqarli kechgan bahsda Hasanboy chindanam professor ekanligini isbotlab, raqibini magʻlub etdi va oltin medalni qoʻlga kiritdi. Bu natijasi bilan u ikki karra Olimpiada chempioni boʻlgan ilk oʻzbek bokschisi nomini oldi. Hasanboyning final jangini uning oila aʼzolari bilan bir qatorda Andijon viloyati hokimi Shuhratdek Abdurahmonov va Buloqboshi tumani hokimi Furqatbek Boʻtaxonovlar birga kuzatdi. 

Koʻp kurash bahslarida ishtirokini boshlagan Taxmina Ikromova saralash bosqichida 126 400 ball toʻpladi. Bu esa unga keyingi bosqichga yoʻl olish uchun yetarli boʻlmadi. Oʻzbekiston terma jamoasi vakili Taxmina Ikromova Olimpiadani 14-natija bilan yakunladi. 

Beshkurash bahslarida ishtirok etayotgan Alise Faxrutdinova esa qilichbozlik boʻyicha kechgan bahslarda 220 ball toʻplashga erishdi va yakunda yarim final yoʻllanmasini qoʻlga kiritdi. 

Erkin kurash boʻyicha bahslarga kirishgan Gʻulomjon Abdullayev (-57 kg) va Javrail Shapiyevlar yarim finalda raqiblariga imkoniyatni boy berganiga qaramay, Olimpiadaning bronza medalini qoʻlga kiritish imkoniyatini saqlab qoldi. Endi ular oʻtish bosqichida ishtirok etadi. 

Maʼlumot uchun, medallar reytingida Oʻzbekiston umumjamoa hisobida 3 ta oltin 2 ta bronza toʻplagan holda 18 oʻrinni egallab turibdi.