Olimpiada kundaligi: Oʻzbekiston yunon-rum kurashi boʻyicha Olimpiadani medalsiz yakunladi

Kechagi bahslarda sportning yunon-rum kurashi boʻyicha bronza medali uchun -77 kg vazn toifasida gilamga chiqqan Aram Vardanyan Armaniston vakili Malxas Amoyan bilan kurashib, 6:5 hisobida imkoniyatni boy berdi. Shu tarzda Vardanyan Parij Olimpiadasini beshinchi oʻrin bilan yakunladi. 

Oradan biroz vaqt oʻtib, yunon-rum kurashi boʻyicha Rustam Assakalov -97 kg vazn toifasida Olimpiadaning uchinchi raqamli sportchisi boʻlish uchun jangga kirdi. Unga bu bosqichda kubalik Gabriel Kindelan raqib boʻldi. Teng kurashlar ostida kechayotgan bahsda Rustam kutilmaganda jarohat oldi va jangni muddatidan avval yakunladi. Natijada jang kubalik kurashchi foydasi hal boʻldi va yakunda Rustam Assakalov ham Olimpiadani beshinchi pogʻonada yakunladi. 

Kun bellashuvlarini boks musobaqalarida ishtirokini davom ettirayotgan Tokio Olimpiadasi chempioni Bahodir Jalolov xushxabar bilan yakunlab berdi. Olimpiadaning eng ogʻir vaznidagi janglarda ishtirok etayotgan Jalolov yarim finalda germaniyalik Nelvi Tiafakka qarshi ringga koʻtarildi. Uch raund davom etgan jangda Bahodir Jalolov Germaniya vakiliga hech qanday imkoniyat qoldirmadi va ketma-ket ikkinchi bor Olimpiada finali yoʻllanmasini qoʻlga kiritdi. Nelvi Tiafakka Parij Olimpiadasining bronza medali bilan qanoatlanishiga toʻgʻri keldi. Jalolovga 11 avgust kuni kechadigan final bahsida ispaniyalik Ayub Gadfa raqib boʻladi.

Maʼlumot oʻrnida, hozirga qadar 4 nafar oʻzbekistonlik charm qoʻlqop ustalari Hasanboy Doʻsmatov, Lazizbek Mullajonov, Asadxoʻja Moʻydinxoʻjay va Bahodir Jalolovlar final yoʻllanmasini qoʻlga kiritgan. Yana bir nafar sportchi esa final yoʻllanmasi uchun kurashadi.