“Olimpiya shaharchasi”da yil mobaynida qancha musobaqa oʻtkaziladi?

Poytaxtimizda qisqa fursatda bunyod etilib, faoliyati yoʻlga qoʻyilgan “Olimpiya shaharchasi” qisqa vaqt ichida 100 gektardan ziyod maydonda Xalqaro olimpiya qoʻmitasi talablariga mos ravishda qurildi. 

Murakkab muhandislik yechimlarini qamrab olgan velodrom, yengil atletikaning 48 ta yoʻnalishi boʻyicha musobaqalar oʻtkazishga moʻljallangan 9 qatorli yugurish yoʻlagidan iborat 12 ming oʻrinli yashil stadion, 25x50 metrli suzish va 25x20 metrli suvga sakrash havzalari, mashgʻulotlar uchun basseyn va trenajyor zallari, 2 ming oʻrinli jamoaviy va yakkakurash sport turlari majmualari mavjud. 

Xoʻsh, har qanday sport turi boʻyicha nufuzli chempionatlar, turnirlar, kompleks oʻyinlarni qabul qilish imkoniyatiga ega “Olimpiya shaharchasi”da joriy yilning keyingi toʻrt oyi mobaynida qanday musobaqalar, oʻquv-mashgʻulot yigʻinlari tashkil etilishi rejalashtirilmoqda?

Sport vazirligi maʼlumotiga koʻra, “Olimpiya shaharchasi” obʼektlarida sport turlari boʻyicha ichki va xalqaro musobaqalar, oʻquv-mashgʻulot yigʻinlarini oʻtkazish uchun tadbirlarning yagona reja-grafigi tasdiqlandi.

Unga muvofiq, daxldor tashkilotlar bilan hamkorlikda hududlarda professional sportchilar zaxirasini tayyorlash boʻyicha sport inshootlari imkoniyatlarini inobatga olgan holda ustuvor sport turlari boʻyicha sport tadbirlari, xususan oʻquv-mashgʻulot yigʻinlari tashkil etilishi belgilandi.

Bunda tegishli sport federatsiya va assotsiatsiyalari tomonidan olimpiya sport turlari boʻyicha yil yakuniga qadar jami 31 ta sport tadbirlari tashkil etilishi tasdiqlandi. 

Shundan velosport, suzish, boks, dzyudo, sport kurashlari, basketbol, qilichbozlik, voleybol, chim ustida xokkey kabi sport turlari boʻyicha 20 ta respublika musobaqalari, 3 ta xalqaro musobaqalar, 6 ta mahalliy oʻquv-mashgʻulot yigʻinlari, 2 ta xalqaro oʻquv-mashgʻulot yigʻinlari tashkil etilishi orqali 6 ming nafarga yaqin sportchi qamrab olinishi nazarda tutilmoqda.