Parij-2024: Bugun ham oʻzbekistonlik sportchilar oltin medal uchun kurashadi

Dastlab suvga sakrash bahslarida Igor Myalin oʻz ishtirokini boshlab beradi. Bu yoʻnalish Olimpiada oʻyinlarida Oʻzbekiston uchun debyut sport turi hisoblanadi. Igor Myalin chiqishlari Toshkent vaqti bilan soat 13:00 da boshlanadi. Soʻngra xuddi shu vaqtda Oʻzbekiston badiiy gimnastika aʼzolari guruh mashqlarida ishtirok etadi. 

Bugun taekvondo boʻyicha ham ikki sportchi Jasur Jaysunov va Ozoda Sobirxonovalar Olimpiadadagi yurishini boshlaydi. Sportning erkin kurash turi boʻyicha Javrail Shapiyev (-86 kg) va Gʻulomjon Abdullayev (-57 kg) bronza medali uchun oʻtish bahslarida ishtirok etsa, Razambek Jamalov Parijdagi ishtirokini boshlaydi. 

Kunni yakunlab beradigan boks musobaqalarining turli vazn toifalarida final janglari boʻlib oʻtadi. -71 kg vazn toifasida oltin medal uchun Asadxoʻja Moʻydinxoʻjayev meksikalik Verde Alvaresga qarshi ringga chiqadi. Bu jang 00:30 dan boshlab tomosha qilishingiz mumkin. Bundan tashqari -92 kg vaznda Lazizbek Mullajonov va Loren Alfonso Dominges Parij Olimpiadasining oltin medali uchun jang qiladi. Bu jang Toshkent vaqti bilan soat 1:35 da boshlanadi.