Oʻqituvchilar birgalikda Maktabgacha va maktab taʼlimi vazirligini sudga berdi

Qayd etilishicha, pedagoglar 2025 yilda ona tili va adabiyot fanidan oʻtkazilgan attestatsiya natijalarini gʻayriqonuniy deb hisoblamoqda.

Pedagoglar tomonidan kiritilgan daʼvo arizasida attestatsiya jarayonlariga oid 9 ta eʼtirozli holat keltirilgan boʻlib, asosiy eʼtibor test savollarining murakkablik darajasi belgilangan vaqt meʼyoriga mutanosib emasligi hamda savollar tuzish jarayonida validlik va testologiya qoidalariga rioya etilmaganligiga qaratilgan.

Ularning aytishicha, apellyatsiya komissiyasi tomonidan pedagoglarning shikoyatlari asosli, huquqiy va daliliy baholanmasdan, "asossiz" deya topilib, rad etilgan.

Oʻqituvchilar Maktabgacha va maktab taʼlim vazirligiga attestatsiya imtihonlarini qayta oʻtkazish majburiyatini yuklash, shuningdek pedagoglarga yetkazilgan maʼnaviy zararni undirish kabi talablarni qoʻyishgan.

"Testlarga ilmiy yondashilmagani va  baholar sunʼiy tushirilgani boʻyicha aniq dalillarimiz bor", deydi bizga oʻqituvchilardan biri.

Maʼlumot uchun, attestatsiyada 73 mingdan ziyod pedagoglar ijobiy natija koʻrsatgan. 104 mingga yaqin (58,9 foiz) pedagoglar esa undan oʻtolmagan.