Rossiya safida urushda qatnashgan andijonlikka jazo tayinlandi

Maʼlum boʻlishicha, Andijon shahrida istiqomat qiluvchi I.X. 2022 yil dekabr oyida ishlash maqsadida Rossiya Federatsiyasiga borgan. U Moskva va Chelyabinsk shaharlarida “Yandeks” platformasi orqali yetkazib berish xizmati bilan shugʻullangan.

2023 yil yanvar oyida I.X. giyohvandlik vositalarining noqonuniy muomalasi bilan bogʻliq jinoyatda ayblanib, Chelyabinsk shahar sudi hukmi bilan 8 yil muddatga ozodlikdan mahrum etilgan.

Jazoni oʻtash davomida unga Rossiya va Ukraina oʻrtasidagi qurolli toʻqnashuvlarda qatnashish evaziga jazodan qutulish imkoniyati taklif qilingan. Shu asosda u 2024 yil avgust oyida Rossiya Qurolli kuchlari bilan shartnoma imzolab, oddiy askar sifatida xizmatga kirishgan.

I.X. 2024 yil avgust–sentabr oylarida Donetsk shahri atrofida olib borilgan janglarda AK-74 oʻqotar quroli bilan qatnashgan. Janglar davomida snaryad portlashi oqibatida ogʻir tan jarohatlari olgan.

Sud-tibbiy ekspertiza xulosasiga koʻra, ayblanuvchi umumiy mehnat qobiliyatining uchdan bir qismidan koʻprogʻini doimiy ravishda yoʻqotgan. Uning chap oyogʻiga “Ilizarov” apparati oʻrnatilgan va u Rossiyaga qarashli harbiy gospitallarda uzoq vaqt davolangan.

2025 yil sentabr oyida I.X. Oʻzbekiston Respublikasining konsullik hujjatlari asosida Vatanga qaytgan.

Jinoyat ishlari boʻyicha Jalaquduq tuman sudi I.X.ni Jinoyat kodeksining 154-moddasi 1-qismida nazarda tutilgan jinoyatni sodir etganlikda aybli deb topdi. Sud unga 5 yil ozodlikdan mahrum qilish jazosini tayinladi, biroq Jinoyat kodeksining 72-moddasiga asosan jazo shartli hisoblanib, 2 yil muddatga ozodlikni cheklash (uy qamogʻi) belgilandi.

Oʻzbekiston qonunchiligiga koʻra, fuqarolarning chet davlatlar harbiy xizmatlarida ishtirok etishi jinoiy javobgarlikka sabab boʻladi. Xususan, Jinoyat kodeksining 154 va 154-1-moddalariga asosan bunday harakatlar uchun 5 yildan 10 yilgacha ozodlikdan mahrum qilish jazosi belgilangan.