Oʻzbekiston soʻz erkinligi reytingida yana 11 pogʻona pastladi

"Chegara bilmas muxbirlar" tashkilotining 2024-yil jahon matbuot erkinligi  indeksida Oʻzbekiston 37,27 ball bilan (100dan) 180 davlat ichidan 148-oʻrinni egalladi. Mamlakatda matbuot erkinligi bilan bogʻliq vaziyat "juda jiddiy" deb baholangan. Maʼlumot uchun, oʻtgan yili bu reytingda Oʻzbekiston 45,37 ball bilan 137-oʻrinni egallagan edi. Bir yil ichida matbuot erkinligi indeksida bu koʻrsatgich 11 pogʻonaga pasaygan.

Tashkilotning taʼkidlashicha, sobiq prezident Islom Karimovning 2016 yilda vafotidan soʻng OAV uchun sharoitlar deyarli yaxshilanmadi va hokimiyatdagilarni tanqid qilish murakkabligicha qolgan. Oʻzbekistonda xususiy televideniye tarmogʻi yoʻq. Davlat radiosi rasmiy targʻibotni olib boradi, xususiy radiostansiyalar yopilishdan qoʻrqib, har qanday tanqiddan oʻzini tutadi, yozma matbuot esa davlat manfaatlariga xizmat qiladi. Baʼzilari xorijda joylashgan 15 ga yaqin onlayn OAV sifatli kontentni nashr etadi. Ular orasida Ozodlik radiosi, Amerikaning Ozod Yevropa/Ozodlik radiosining oʻzbek tilidagi xizmati mamlakatda bloklangan.

Rasmiylar ommaviy axborot vositalariga qarshi repressiv qonunlarni tugatish uchun zarur boʻlgan islohotlarni hali amalga oshirmagan. Senzura hali ham kuchli. Oʻz mustaqilligini saqlab qolish uchun ayrim mahalliy internet nashrlari jarimaga tortilish xavfi ostida OAV sifatida rasman roʻyxatdan oʻtishni istamaydi. Tovlamachilik va soxta ayblovlar sabab baʼzi blogerlar faoliyatini yakunladi va qamoqqa olindi. Qamoqqa olingan oxirgi jurnalistlarning baʼzilari ozod qilingan, ammo reabilitatsiya qilinmagan.