Ўзбекистон сўз эркинлиги рейтингида яна 11 поғона пастлади

"Chegara bilmas muxbirlar" ташкилотининг 2024-йил жаҳон матбуот эркинлиги  индексида Ўзбекистон 37,27 балл билан (100дан) 180 давлат ичидан 148-ўринни эгаллади. Мамлакатда матбуот эркинлиги билан боғлиқ вазият "жуда жиддий" деб баҳоланган. Маълумот учун, ўтган йили бу рейтингда Ўзбекистон 45,37 балл билан 137-ўринни эгаллаган эди. Бир йил ичида матбуот эркинлиги индексида бу кўрсатгич 11 поғонага пасайган.

Ташкилотнинг таъкидлашича, собиқ президент Ислом Каримовнинг 2016 йилда вафотидан сўнг ОАВ учун шароитлар деярли яхшиланмади ва ҳокимиятдагиларни танқид қилиш мураккаблигича қолган. Ўзбекистонда хусусий телевидение тармоғи йўқ. Давлат радиоси расмий тарғиботни олиб боради, хусусий радиостанциялар ёпилишдан қўрқиб, ҳар қандай танқиддан ўзини тутади, ёзма матбуот эса давлат манфаатларига хизмат қилади. Баъзилари хорижда жойлашган 15 га яқин онлайн ОАВ сифатли контентни нашр этади. Улар орасида Озодлик радиоси, Американинг Озод Европа/Озодлик радиосининг ўзбек тилидаги хизмати мамлакатда блокланган.

Расмийлар оммавий ахборот воситаларига қарши репрессив қонунларни тугатиш учун зарур бўлган ислоҳотларни ҳали амалга оширмаган. Цензура ҳали ҳам кучли. Ўз мустақиллигини сақлаб қолиш учун айрим маҳаллий интернет нашрлари жаримага тортилиш хавфи остида ОАВ сифатида расман рўйхатдан ўтишни истамайди. Товламачилик ва сохта айбловлар сабаб баъзи блогерлар фаолиятини якунлади ва қамоққа олинди. Қамоққа олинган охирги журналистларнинг баъзилари озод қилинган, аммо реабилитация қилинмаган.