BMTning 80 yilligi munosabati bilan unda nutq soʻzlash uchun AQShga borgan Mirziyoyev Tramp bilan koʻrishdi.

«Albatta, siz bilan telefon suhbatida gaplashgan narsalarimizning hammasi amalga oshmoqda. Sizni yana bir bor dunyoda 7 ta nizoga yakun yasaganingiz bilan tabriklashni xohlayman. Ayniqsa, bizning mintaqamiz uchun eng muhimi – Ozarbayjon va Armaniston orasidagi nizoga yechim topdingiz. Men yana bir bor takrorlayman, Nobel mukofotiga sizdan koʻra loyiqroq odam yoʻq. Biz buni aytganmiz va aytamiz», — dedi Oʻzbekiston rahbari.

Tramp Shavkat Mirziyoyevni «buyuk yetakchi» deb taʼrifladi.

«Oʻzbekiston prezidenti bilan birga boʻlish ulkan sharaf. Uni juda hurmat qilaman. U uzoq vaqtdan beri ishlab kelmoqda. Koʻp yillar, toʻgʻrimi? Taxminan 15-16 yil boʻldi. Bu ham anchagina vaqt. Biror odam mamlakatni shuncha muddat boshqara olishi uchun yagona sabab – juda aqlli va malakasi baland boʻlishi kerak. Biz bilan birga boʻlganingiz uchun rahmat. Bilasizlarmi, u turli AQSh mahsulotlarini sotib oldi. Ularning mablagʻlari yetarli. Ularning nefti ham koʻp, puli ham koʻp. Odatda, neft pul bilan yaxshi chiqishadi. Lekin ular mamlakat sifatida juda yaxshi natijalarga erishgan va u haqiqatdan ham buyuk yetakchi. Siz bilan yana birga boʻlayotganim katta sharaf. Rahmat», — dedi Donald Tramp.

Muzokaralar yakunida davlatimiz rahbari prezident Donald Trampni oʻzi uchun qulay muddatda Oʻzbekistonga rasmiy tashrif bilan kelishga taklif etdi.

«Sizni Oʻzbekistonda kutaman. Birinchi tashrif boʻlishi kerak. Siz menga birinchi bor Samarqandga borishga vaʼda qilgansiz», — dedi Shavkat Mirziyoyev uchrashuv soʻnggida.

Tramp esa unga Amerika mahsulotlarini xarid qilgani uchun minnatdorlik bildirdi.

«Men uni [Samarqand nazarda tutilmoqda] yaxshi koʻraman. Men amalga oshirish haqida oʻylayapman. Haqiqatan ham ajoyib operatsiya, ajoyib odamlar guruhi, juda aqlli mamlakat va ular juda yaxshi ish qildilar va men Amerikaning mahsulotlarini xarid qilganingiz uchun minnatdorman», — dedi AQSh yetakchisi.