Bolalarga nisbatan zo'ravonlik uchun umrbod qamoq jazosi bo'yicha qonun loyihasi qabul qilindi

Hujjatga ko'ra, 14 yoshga to'lmagan bolalarga nisbatan nomusga tegish va jinsiy ehtiyojni zo'rlik bilan g'ayritabiiy usulda qondirish jinoyatlari uchun 25 yilgacha yoki umrbod ozodlikdan mahrum qilish jazosi belgilanmoqda.

Shuningdek, zo'ravonlikdan jabrlangan bolalarni so'roq qilishni videoyozuvga olish va ularga davlat hisobidan yuridik yordam ko'rsatish nazarda tutilgan.

Qonun loyihasi bilan 5 ta kodeks va 7 ta qonunga o'zgartish va qo'shimchalar kiritish nazarda tutilgan. U bolalarni zo'ravonlikdan himoya qilish, ularning huquq va manfaatlarini kafolatlash hamda mas'ul davlat organlari va tashkilotlarining javobgarligini kuchaytirishga qaratilgan.

"Bugun muhokama qilinayotgan qonun hayotimizning mazmuni bo'lgan bolalarga, ularning himoyasiga, erkinligiga, sha'ni va qadr-qimmatiga qaratilgan. Umid qilamanki, bu qonun barchamizni hushyorlikka chaqiradi. Bola manfaatlarini himoya qilishda mustahkam qalqon bo'lib xizmat qiladi", — dedi Demokratik institutlar va fuqarolik jamiyatini rivojlantirish masalalari qo'mitasi raisi Gulruh Agzamova.