"Omonqoʻton"da tabiatga jami 1 mlrd soʻmdan ortiq zarar yetkazildi

Aytilishicha, qonunbuzarlar tomonidan bogʻ hududida texnikalar yordamida tekislash, kovlash ishlari olib borilgan. "Omonqoʻton" milliy tabiat bogʻiga tegishli boʻlgan 869 metr kvadrat maydonda "Taxti Qoracha" dovoni bilan bogʻlovchi yoʻl hosil qilinganligi maʼlum boʻlgan. 

Buning oqibatida yoʻlda mavjud boʻlgan 7 turdagi jami 64 tup daraxt va butalarga zarar yetkazilgan, shundan 27 tup daraxt va butalar tag qismidan kesilgan yoki qoʻporib olingan, qolgan 37 tup daraxt va butalar esa oʻsishdan toʻxtamaydigan darajada shikastlangan. Oʻsimlik dunyosiga 67 mln 726 ming soʻm miqdorda zarar yetkazilgan. 

Shuningdek, hududda olib borilgan yoʻl solish ishlari oqibatida jami 2296 metr kvadrat yer maydonida mavjud Qizil kitobga kiritilgan, kamayib borayotgan va noyob tur hisoblangan 12 turdagi 2 ming 591 tup oʻsimliklar payhon qilinib, tabiatga 1 mlrd 48 mln soʻm miqdorida zarar yetkazilgan. Umumiy hisobda tabiatga yetkazilgan zarar miqdori 1 mlrd 115 mln soʻmni tashkil etmoqda. 

Bundan tashqari, xabarda hozirda ish yuzasidan toʻplangan hujjatlar tegishli chora koʻrish maqsadida Bosh prokuraturaga yuborilgani ham maʼlum qilingan.