Toshkent ko‘chalaridan biriga Mustafo Kamol Otaturk nomi beriladi

“Toshkent shahridagi ko‘chalardan biriga Mustafo Kamol Otaturk nomini berish to‘g‘risida”gi Prezident qarori 15-iyun qabul qilindi. 

Qarorga ko‘ra, Toshkent shahri Yashnobod tumanida barpo etilayotgan “O‘zbek-turk do‘stligi” xiyoboniga yondosh bo‘lgan Abdulla Qodiriy ko‘chasining bir qismiga (Istiqbol, Farg‘ona yo‘li va Nukus ko‘chalari kesishmasidan Abdulla Qodiriy ko‘chasi va Mahtumquli shohko‘chasi kesishmasigacha) Mustafo Kamol Otaturk nomi beriladi.

Mustafo Kamol Otaturk kim?

Turkiya Respublikasining birinchi prezidenti Mustafo Kamol Otaturk 1881-yili Usmonlilar imperiyasiga qaram bo‘lgan Gretsiyaning Saloniki shahrida tavallud topgan.

Salonikida uning siyosiy faoliyati boshlangan. Dastlab, Yosh turklarning “Ittihod va taraqqiy” partiyasiga a’zo bo‘lgan (1908), keyinchalik ulardan asta-sekin uzoqlashgan. Italiya-Turkiya urushi (1911-1912), 2-Bolqon urushi (1913), Birinchi jahon urushida qatnashgan.

U irodali siyosatchi, mohir qo‘mondon, kuchli notiq edi. Otaturk tashabbusi bilan Usmonli turk sultonligi tugatilib, (1922-yil 1-noyabr), Turkiya respublika deb e’lon qilindi (1923-yil 29-oktabr).

Davlat boshqaruvi tubdan o‘zgartirilib, siyosat, iqtisodiyot, madaniyat va harbiy sohada chuqur islohotlar o‘tkazgan. Mamlakat taraqqiyotining ustuvor yo‘nalishlarini belgilab beruvchi 6 ta tamoyilni ishlab chiqqan.

Uning ta’limoti Turkiyada otaturkchilik, G‘arbda esa kamolizm deb ataladi. Turkiya Respublikasida islom dinining ta’siri kamaytirib, uni G‘arb namunasidagi dunyoviy davlatga aylantirish jarayonini boshlab bergan Otaturk.