Rossiyada mahkumlarning maoshi oʻqituvchilarinikidan ham koʻp

Dibovaga koʻra, hozirda Rossiyaning turli hududlaridagi savdo-sanoat palatalari biznesga Federal jazoni ijro etish xizmati (FSIN) bilan hamkorlik qilishda yordam bermoqda. Bu orqali «minglab ish oʻrinlari» yaratilgan va jami 800 mln rubllik shartnomalar tuzilgan. Biroq u qayd etganidek, korxonalar mahkumlarning yetarli malakaga ega emasligi va ularning «aylanmasi yuqori» ekanligi sababli qiyinchilikka duch kelmoqda.

«Ishchi tayyorlanganidan keyin u ozod etiladi va korxona yangidan tayyorlanmagan xodim bilan ish boshlashga majbur boʻladi», — dedi Dibova.

Shuningdek, korxonalar qimmat uskunalarni koloniyalarga joylashtirishni xohlamasligi va ichki tartib-qoidalar sababli ish jadvalini taʼminlash qiyin ekanligi taʼkidlangan.

Hisob-kitoblarga koʻra, mahkumlar maoshi Rossiyaning koʻpgina oblastlaridagi oʻqituvchilar oyliklaridan 1,5 barobar yuqori. «Oʻqituvchi» kasaba uyushmasi maʼlumotlariga koʻra, 73 mintaqada pedagoglar ish haqi 22 440 rubllik minimal maosh miqdoridan ham past. Hatto 70 hududda oʻqituvchilarning stavkasi 20 ming rublga yetmaydi.

Rossiya boʻylab oʻqituvchilar yetishmasligi taxminan 250 ming nafarni tashkil etadi, ularning uchdan bir qismi 50 yoshdan oshgan. Ayrim maktablarda mutaxassis yetishmasligi sababli darslar bekor qilinadi yoki boshqa fan oʻqituvchilari oʻtkazishga majbur boʻladi. Shu tufayli pedagoglar meʼyordan 1,5–2 barobar koʻproq ishlaydi, yosh kadrlar esa past maosh va ortiqcha yuklama tufayli sohaga qiziqishni yoʻqotmoqda.