Rossiyadan 30 nafar bola Oʻzbekistonga olib kelinmoqda

Ichki ishlar, Sogʻliqni saqlash vazirliklari xodimlaridan iborat ishchi guruh ota-onasi qaramogʻidan mahrum boʻlgan bolalarni Tashqi ishlar vazirligi koʻmagida Toshkentga qaytarish maqsadida Rossiya Federatsiyasiga joʻnab ketgan. 

Qayd etilishicha, hozirda Moskva, Sankt-Peterburg, Astraxan, Volgograd, Irkutsk, Chelyabinsk, Vladivostok va Ulyanovsk shaharlarida, shuningdek, Moskva, Leningrad, Oryol, Smolensk va Vladimir viloyatlarida ota-ona qaramogʻidan mahrum boʻlgan 30 nafar bolaning hujjatlarini rasmiylashtirish ishlarini olib borilmoqda. 

Shuningdek, voyaga yetmagan bolalarning doimiy roʻyxatdan oʻtgan joyidagi "Inson" ijtimoiy xizmatlar markazlari tomonidan olib kelinayotgan bolalarni oilaviy muhitga qaytarish boʻyicha chora-tadbirlar koʻrilmoqda. Rejaga asosida:

— 23 nafar voyaga yetmagan bola ota-onasiga topshiriladi,
— 5 nafar bola qarindoshlarining vasiyligiga beriladi,
— 2 nafari muqobil joylashtirish shakllariga oʻtkaziladi.

Maʼlumot oʻrnida, yil boshidan beri xorijda ota-ona qaramogʻidan mahrum boʻlgan 10 nafar bola vatanga qaytarilgan.