Mirziyoyev AQShda kimlar bilan uchrashdi?

Davlat rahbari kimlar bilan uchrashdi

22-sentabr kuni Shavkat Mirziyoyev Nyu-York shahrida Xalqaro valyuta jamgʻarmasi boshqaruvchi direktori Kristalina Georgiyevani qabul qildi. 

Foto: Prezident.uz

Tomonlar XVJ bilan hamkorlikni kengaytirish, makroiqtisodiy siyosat, byudjet va soliq maʼmuriyatchiligini takomillashtirish masalalarini muhokama qildi.

Uchrashuvda mamlakat moliya sohasining barqarorligi, «yoʻl xaritasi»ni amalga oshirish hamda XVJ markazlarida oʻzbekistonlik mutaxassislarning malaka oshirishi ijobiy baholandi.

Foto: Prezident.uz

Prezident oʻziga ajratilgan qarorgohda AQShning Traxys kompaniyasi direktorlar kengashi raisi Alan Dokter, Kolorado Geologiya maktabi vitse-prezidenti Jon Bredford, FLSmidth kompaniyasi katta vitse-prezidenti Piter Flanagan, McKinsey kompaniyasi katta hamkori va Markaziy Osiyo boʻyicha ofisi rahbari Ermolay Soljenitsin, shuningdek, Go Green Partners bosh direktori Mixail Sedoy bilan uchrashdi.

Foto: Prezident.uz

Shavkat Mirziyoyev BlackRock kompaniyasi katta boshqaruvchisi Adebay Ogunlesi bilan ham uchrashdi.

Uchrashuvda energetika, transport va suv infratuzilmasini rivojlantirish boʻyicha strategik hamkorlik masalalari muhokama qilindi. Shuningdek, qoʻshma fond va qoʻshma loyihalarni amalga oshirish rejalari qoʻllab-quvvatlandi.

Foto: Prezident.uz

Mirziyoyev Jahon banki guruhi prezidenti Ajay Bangani qabul qildi.

Uchrashuvda strategik sheriklikni kengaytirish, barqaror iqtisodiy oʻsish, kambaqalilikni kamaytirish va ijtimoiy-iqtisodiy loyihalarni qoʻllab-quvvatlash masalalari muhokama qilindi.

Shuningdek, Markaziy Osiyo infratuzilmasini rivojlantirish va qoʻshma loyiha portfelini kengaytirish istiqbollari koʻrib chiqildi.

Foto: Prezident.uz

Oʻzbekiston rahbari AQShning yirik moliyaviy korporatsiyasi Citigroup raisi Jon Dugan bilan koʻrishdi.

Uchrashuvda bank va davlat korxonalari uchun obligatsiyalarni joylashtirish, IPO bitimlari, yevroobligatsiyalar chiqarish hamda moliyaviy yechimlarni rivojlantirish masalalari muhokama qilindi.

Shuningdek, tomonlar oʻzaro manfaatli hamkorlikni kengaytirish boʻyicha «yoʻl xaritasi»ni qabul qilishga kelishib oldi.

Shu bilan birga, davlat rahbari quyidagi shaxslarni ham qabul qildi:

• Franklin Templeton kompaniyasi prezidenti va bosh ijrochi direktori Jenni Jonson;
• BNY kompaniyasi bosh tijorat direktori Katinka Vals;
• Jefferies kompaniyasi rahbari Brayn Fridman;
• NASDAQ fond birjasi raisi Adena Fridman;
• Oppenheimer Holdings kompaniyasi prezidenti va bosh ijrochi direktori Robert Lovental;
• Boeing Global kompaniyasi prezidenti Brendan Nelson;
• AQSh Prezidentining Janubiy va Markaziy Osiyo boʻyicha maxsus vakili Serjio Gor;
• Air Products kompaniyasi bosh ijrochi direktori Eduardo Menezes; 
• Jahon savdo tashkiloti bosh direktori Ngozi Okonjo-Iveala.
•  

Maʼlumot uchun, Shavkat Mirziyoyev bugun, 23-sentabr kuni, Nyu-York vaqti bilan 13:00–15:00 (Toshkent vaqti bilan 22:00–00:00) oraligʻida BMTning 80 yilligiga bagʻishlangan yigʻilishda nutq soʻzlaydi. Bu Oʻzbekiston rahbarining BMT Bosh Assambleyasidagi 5-chi chiqishi boʻladi.