Prezident Mirziyoyev dehqonlarga nimalarni vaʼda qildi?

Qayd etilishicha, mazkur kengashni boshqarish uchun "Uzagrostar" xolding kompaniyasi tashkil etiladi. Ushbu xolding tarkibida meva-sabzavotchilik yoʻnalishlariga ixtisoslashgan 15 ta kompaniya ochiladi. Ushbu kompaniyalar meva-sabzavot yetishtirish boʻyicha oʻz brendini yaratgan 15 ta drayver tumanni yangi bosqichga olib chiqib, ularning tajribasini yana 72 ta tumanda ommalashtiradi. 

Shuningdek, har bir kompaniyaga byudjetdan 20 milliard soʻmdan mablagʻ ajratiladi. Tomorqa kengashida alohida jamgʻarma tashkil qilinib, dastlabki bosqichda 260 milliard soʻm pul va 1,2 trillion soʻmlik kredit portfeli beriladi. 

Buning hisobiga 15 ta kompaniya biriktirilgan tumanlardagi ixtisoslashgan mahallalar aholisini oʻziga mijoz qilib, mablagʻ bilan taʼminlaydi. Tomorqada hosilni koʻpaytirish uchun chetdan yangi texnologiya va ekspertlar olib keladi. 

Bundan tashqari, xonadonlarga hosildor urugʻ va koʻchat, sifatli oʻgʻit yetkazish, agrotexnik xizmatlar koʻrsatish, mahsulotini qayta ishlash, saqlash va eksport qilishda koʻmaklashadigan tizim tashkil etiladi. 

Dehqon xoʻjaliklari va tomorqa egalarini qoʻllab-quvvatlash boʻyicha qoʻshimcha imkoniyatlar yaratiladi. Jumladan, mahalla va xonadonlarda muzlatkich, qadoqlash, quritish, qayta ishlash omborlari va issiqxonalar qurilib, aholiga 5 yilda boʻlib toʻlash sharti bilan tayyor holda beriladi. 

Tomorqa xizmatlarini yoʻlga qoʻygan tadbirkorlarga 7 yil muddatga 17,5 foizli imtiyozli kredit ajratiladi. Aholi va dehqonlarning eng namunali loyihalari uchun har yili 20 milliard soʻmlik grantlar eʼlon qilinadi. Bunda 500 ta mahalladagi eng zoʻr loyihaga 40 million soʻmdan grant beriladi. 

Shu bilan birga, mahallada eksportbop mahsulot yetishtirishni yoʻlga qoʻyib bergan usta-dehqonlarga 100 million soʻmgacha, qisqa muddatli oʻquv kursini tashkil qilganlarga 5,5 million soʻm subsidiya ajratiladi. Suv taʼminoti ogʻir joylarda yomgʻir suvini toʻplash va saqlash sigʻimini qurish xarajatining yarmi qoplab beriladi. 

Oxirgi uch yilda 260 ming gektar yer aholiga boʻlib berilgan edi. Endi bu takomillashtirilib, Qoraqalpogʻiston Respublikasi, Andijon, Jizzax va Toshkent viloyatida boʻsh turgan 3 ming 300 gektar yer tajriba tariqasida yangicha tartibda ijaraga beriladi. Bunda, konturlar 3 gektardan 50 gektargacha yaxlit holda savdoga qoʻyilib, 49 yilga ijaraga beriladi. 

Bu yil kartoshkachilikni rivojlantirish uchun Qishloq xoʻjaligi jamgʻarmasidan 400 milliard soʻm yoʻnaltiriladi. Import qilingan hamda mahalliy yetishtirilgan urugʻlik kartoshkani sotishda qoʻshilgan qiymat soligʻining 50 foizi "keshbek" sifatida qaytarib beriladi. 2027 yildan kartoshkaga ehtiyoj toʻliq ichki imkoniyat hisobidan qoplanishi rejalashtirilgan.