“Yadroviy qurol jahon urushiga qarshi yagona kafolatdir” — Kreml

Davlatlar o‘rtasida yangi qurollanish poygasi borasidagi xavotirlar fonida Kreml yadroviy qurol dunyoni global urushga g‘arq bo‘lishdan saqlab turuvchi “yagona” qalqon ekanini ta’kidladi.

Rossiya va AQSh o‘rtasidagi yadroviy qurollarni nazorat qilish bo‘yicha so‘nggi shartnoma — “Yangi START”ning amal qilish muddati fevral oyida tugadi.

Tomonlar yuqori darajadagi harbiy muzokaralarni qayta tiklashga kelishib olgan bo‘lsa-da, hozircha hech bir taraf shartnomani yangilash yoki boshqasi bilan almashtirishga harakat qilayotgani yo‘q.

Moskvadagi tashqi siyosat forumida so‘zga chiqqan Kreml matbuot kotibi Dmitriy Peskov global xavfsizlik tizimi “yemirilayotganini” ta’kidladi.

“Aslida, bizda yadroviy tiyib turishdan boshqa hech narsa qolmadi. Dunyoni global urushdan himoya qiladigan yagona narsa ham shu”, – dedi Peskov.

“Texnologiyalar rivojlanar ekan, yadroviy bo‘lmagan qurollarning yangi turlari paydo bo‘lishi allaqachon ayon. Ammo ular oxir-oqibat o‘zining vayronkor kuchi bilan yadroviy qurollarga tenglashishi mumkin”, – deya qo‘shimcha qildi u.

Rossiya prezidenti Vladimir Putin Ukrainadagi to‘rt yillik bosqini davomida yadroviy ritorikadan bir necha bor foydalandi. Buni Yevropa va AQSH beparvolik bilan qurol o‘ynatishga yo‘ydi.

Donald Tramp yadroviy salohiyati o‘sib borayotgan, biroq hamon Rossiya yoki Qo‘shma Shtatlarnikidan ancha kichik bo‘lgan Xitoyni ham yangi shartnomaga kiritishga undadi.

Ushbu bosimni ochiqchasiga rad etdi Pekin.

Moskvaning ta’kidlashicha, agar Xitoy yangi kelishuvga qo‘shilsa, u holda Vashingtonning yadroviy ittifoqchilari hisoblanmish Buyuk Britaniya va Fransiya ham kiritilishi kerak.

“Yangi START” shartnomasining muddati tugashi bilan dunyo so‘nggi o‘n yilliklarda ilk bor yadroviy qurollarni joylashtirishni cheklovchi amaldagi kelishuvsiz qoldi.

2010-yilda imzolangan ushbu bitim “Sovuq urush” davridagi qurollarni nazorat qilish bo‘yicha bir qator kelishuvlarning so‘nggisi bo‘lib, Moskva va Vashingtonning har biriga 1550 tadan ortiq jangovar kallak joylashtirishni taqiqlagan edi.

Shartnoma muddati tugashidan avval har ikki davlat bir-birini kelishuvga rioya qilmaslikda bir necha bor ayblagan.