Vladimir Putin: “Menimcha, urushni tugatish imkoniyati bor”

3-sentyabr kuni Rossiyaning Uzoq Sharqidagi iqtisodiy forumda so‘zga chiqqan Vladimir Putin qator davlatlar, jumladan, AQSh va Xitoy tinchlik kelishuvini qo‘llab-quvvatlashga tayyor ekanini aytdi. Bu haqda Reuters xabar berdi.

“Biroq, yakunda, muammoni mojaroga aloqador davlatlar — Rossiya va Ukraina hal qilishi kerak. Biz kelishuvga hissa qo‘shishga urinayotgan har bir kishidan minnatdormiz. Imkoniyat bormi? Nazarimda, ha, bor”. — dedi Putin.

Zelenskiy esa tungi videomurojaatida AQSH muzokarachilarining tashrifi uchun dastlabki sanalar belgilanganini aytdi.

“Biz AQSH prezidenti vakillarini Kiyevda kutib qolamiz”, — dedi Zelenskiy.

Zelenskiyning aytishicha, Eron bilan mojarosini davom ettirayotgan Donald Tramp Ukraina urushi tugashini hamda har ikki tomon ko‘rayotgan yo‘qotishlarga barham berilishini istaydi.

Avvalroq Tramp jurnalistlarga Kreml rahbari tinchlik kelishuviga tayyor bo‘lgach, Putin bilan sammit o‘tkazish niyatida ekanini aytgan edi.

Ikkinchi jahon urushidan keyin Yevropada yuz bergan eng qonli mojaroga 4,5 yil to‘ldi. Tomonlar so‘nggi bor fevral oyida AQSH vositachiligidagi muzokaralarda uchrashgandi.

O‘shandan beri AQSH Eron urushi bilan ovora. Bu vaqtda esa Rossiya va Ukraina bir-birining hududiga uzoq masofali havo hujumlarini kuchaytirdi. Dengizdagi ziddiyatlar ham keskinlashib, har ikki tomonning portlar va savdo kemalariga hujumlari dunyoda g‘alla narxini oshirib yubordi.

Putin: “Ukraina bilan aloqalarimiz bardavom”

“Yaqinda Ukraina oliy rahbariyatining bayonotlarini inobatga oladigan bo‘lsak, bu aloqalar qay darajada tinchlik bitimiga olib kelishi haqida biron nima deyishim qiyin. Shunday bo‘lsa-da, maxfiy aloqalar mavjud va uzluksiz davom etmoqda”, – dedi Putin.