AQSH muzokarachilari ketishi bilan Rossiya Kiyevga hujum boshladi

8-sentyabr kuni erta tongda, AQSH muzokarachilari jo‘nab ketganidan ko‘p o‘tmay, Rossiya Ukraina poytaxti Kiyevga havo hujumlarini qayta boshladi. Bu haqda Reuters yozdi.

Shahar meri Vitaliy Klichkoning ma’lum qilishicha, shaharga ballistik raketalar bilan hujum qilingan va olti kishi jarohatlangan.

“Odamlar turar joy binosida qolib ketgan, Kiyevning turli joylarida yong‘inlar chiqqan”, — deb yozdi Klichko Telegram’da.

Kiyev harbiy ma’muriyatiga ko‘ra, qulagan vayronalar oqibatida besh qavatli turar joy binosi va uch qavatli uy shikastlangan hamda odamlardan boshpana izlash so‘ralgan.

Kiyevda portlashlar eshitilayotgan bir paytda, qo‘shni Polsha havo hududining buzilishi xavfidan himoyalanish uchun harbiy aviatsiya amaliyotlarini boshladi.

Ukraina Saratov viloyatiga zarba berdi

Viloyat gubernatorining so‘zlariga ko‘ra, Rossiyaning Saratov shahrida Ukraina dronlari hujumi oqibatida fuqarolik infratuzilmasi shikastlangan va odamlar jarohat olgan. Bu shahar Volga daryosi bo‘yida, Moskvadan taxminan 730 km janubi-sharqda joylashgan.

Bu hududda “Rosneft” (ROSN.MM) davlat neft kompaniyasi tomonidan boshqariladigan yirik neftni qayta ishlash zavodi hamda bir qator sanoat va harbiy obyektlar joylashgan.